"რესპუბლიკური პარტიის" მაჟორიტარობის კანდიდატი ქუთაისში, ნატო ქათამაძე საუბნო საარჩევნო კომისიების დამოუკიდებელი წევრების არჩევა გააპროტესტა.

მისი თქმით, საოლქო საარჩევნო კომისიამ გამოცდილი კადრი გამოუცდელით ჩაანაცვლა.

ამის შესახებ ნატო ქათამაძემ ქუთაისის დემოკრატიული ჩართულობის ცენტრში ისაუბრა.

"ისინი არიან მხოლოდ სიტყვით დამოუკიდებელი. სიმანდვილეში, ისინი არიან პარტიული ნიშნით შერჩეული. მაქვს იმ უბნების სია, სადაც ვნახავთ, რომ გამოცდილი კადრები ჩანაცვლდა სტუდენტებით, მედდებით, ფარმაცევტებით. რადგან "ქართული ოცნებიდან" ჩემი კონკურენტი არის დიმიტრი მხეიძე, და ის არის მედიკოსი, ალბათობა იმისა, რომ ეს ხალხი თამაშობს დიმიტრის თამაშს, სახეზეა," – აცხადებს ნატო ქათამაძე.

"რესპუბლიკური პარტიის" მაჟორიტარობის კანდიდატის განცხადებით, საპარლამენტო არჩევნები არათანაბარ გარემოში მიმდინარეობს და მოქმედი ხელისუფლება, ყოფილის მსგავსდ, ცდილობს გააყალბოს ის.

შეხვედრაზე ნატო ქათამაძემ მის სამაჟორიტარო ოლქში საუბნო კომისიებში წარდგენილი და შერჩეული კადრების შესახებ დოკუმენტაცია წარმოადგინა.

"#50–ე უბნზე 18 კონკურსანტიდნ აირჩიეს 5, საიდანაც გამოცდილება აქვს მხოლოდ ერთს. ასეთივე მდგომარეობაა ოლქის 41–ვე უბანზე," – განაცხადა ნატო ქათამაძემ.

"რესპუბლიკელი" კანდიდატი დაინტერესებულია რა კრიტერიუმებით შეარჩია საოლქო საარჩვენო კომისიამ გამოუცდელი და არაპროფესიონალი კადრი.

ცესკოს სპიკერი ანა მიქელაძე ქუთაისიპოსტთან საუბარში განმარტავს, რომ საუბნო საარჩვენო კომისიების დაკომპლექტება გამჭირვალედ და კანონის სრული დაცვით მოხდა, რომლის დაკვირვების შესაძლებლობა არჩევნებში ჩართულ ყველა მხარეს ჰქონდა.

"მნიშვნელოვანია, რომ არჩეულია ბევრი გამოცდილი კადრი, რომლებმაც მაღალ დონეზე ჩაატარეს საერთაშორისო და ადგილობრივი ორგანიზაციების მიერ, წლების განმავლობაში დადებითად შეფასებული არჩევნები. ეს პირები არჩეული არიან მაღალი ქვორუმით. არჩეულ წევრებს შორის, ასევე, არიან საარჩევნო განვითარების სკოლის კურსდამთავრებულებიც," – აცხადებს ანა მიქელაძე.

ცესკოს სპიკერი წინასწარ საუბნო საარჩევნო კომისიების წევრების კვალიფიკაციაზე საუბარს სამართლიანად არ მიიჩნევს.

"ჯერ მათ არ დაუწყიათ მუშაობა. შესაბამისად, მათი მიერ შესრულებული სამუშოს ხარისხის შესახებ საუბარი, რომელიმე მხარის მიერ, არის რთული. როდესაც დაიწყებენ ისინი საკუთარი სამუშაოს შესრულებას, თუკი არჩევნებში ჩართულ რომელიმე მხარეს ექნება დადასტურებელი ფაქტობრივი მოსაზრებები, საარჩევნო ადმინისტრაცია, რა თქმა უნდა, ამ საკითხებზე იმსჯელებს," – განაცხადა ანა მიქელაძემ ქუთაისიპოსტთან საუბარში.