ქუთაისის ტერიტორია 9 ფუნქციურ ზონად და 20 ქვეზონად დაიყოფა.
ქალაქის რამდენიმე ზონად დაყოფა ქუთაისის მერის მრჩევლების მიერ შემუშავებული "ქუთაისის მუნიციპალიტეტის ტერიტორიებისა და განაშენიანების რეგულირების წესის" მიხედვით მოხდა. დოკუმენტს თვის ბოლოს საკრებულოს სხდომაზე დასამატკიცებლად გაიტანენ. რეგულირების ახალი წესის თანახმად, ქალაქის სხვადასხვა უბნების მიხედვით იცვლება განაშენიანების კოეფიციენტიც.

პროექტის სამუშაო ვერსია მრჩევლებმა უკვე წარუდგინეს ქალაქის მერსა და საკრებულოს უმრავლესობის დეპუტატებს. ურბანული კუთხით ქალაქის მერის მრჩევლის ოთარ ჩიხლაძის განმარტებით, პროექტზე მუშაობა ოთხი თვის განმავლობაში მიმდინარეობდა.

დოკუმენტში განმარტებულია თუ რისი მშენებლობაა შესაძლებელია ამა თუ იმ ზონაში.

სპეციალურ ზონა - 1 წარმოადგენს ზონას, რომელიც მდებარეობს განაშენიანებული ტერიტორიების საზღვრებში ან საზღვრებს გარეთ, სადაც დასაშვებია სასწავლო და სამედიცინო კომპლექსების, სამეცნიერო კვლევითი, სამეცნიერო-საწარმოო დაწესებულებების, აგრეთვე საქალაქო ინფრასტრუქტურის მომსახურების ობიექტების განთავსება. ამ ზონაში მდებარე მიწის ნაკვეთის გამწვანების კოეფიციენტია (კ-3) -0, 2;

სამაგიეროდ, განხვავებულია სპეციალური ზონა -2. რადგან ეს ზონა წარმოადგენს სასაფლაოებისთვის განკუთვნილ ტერიტორიებს.

პროექტის ერთ-ერთი ავტორი, ქალაქის მერის მრჩეველი ზურაბ ხურციძე განმარტავს, რომ ამ პროექტის მიხედვით განსაზღვრული იქნება სად უნდა აშენდეს მაღალი და დაბალი შენობები.

ის ამბობს, რომ ამ დრომდე ქალაქში მხოლოდ სამი ზონა არსებობდა, სადაც დარეგულირებული არ იყო რა ტიპის ობიექტი სად უნდა აშენებულიყო.

"ამ დოკუმენტის მიხედვით ქალაქის ცენტრალურ ნაწილში არ შეიძლება აშენდეს ოთხ სართულზე ზევით. შესაძლებელია მანსარდის დამატება იმ შემთხვევაში, თუ გაკეთდება მიწისქვეშა ავტოსადგომი", - განმარტავს ზურაბ ხურციძე.

ქუთაისის მერის, შოთა მურღულიას განმატებით, ქალაქში მშენებლობის ტემპი გაიზარდა, რის გამოც მნიშვნელოვანია განაშენიანების რეგულაცია სწორად იყოს განსზღვრული.

"უკვე იქნება სხვადასხვა ტიპის განაშენიანება, რაც ქალაქის არქიტექტურის შენარჩუნების საშუალებას მოგვცემს", - აღნიშნავს ქალაქის მერი.

პროექტში აღნიშნულია, რომ რეგულირების ახალი წესი შედგენილია "სივრცითი მოწყობისა და ქალაქთმშენებლობის საფუძვლების შესახებ" საქართველოს კანონის შესაბამისად.