ქუთაისში, მწერალთა სახლის შენობა, სადაც რამდენიმე დღის წინ ცეცხლი გაჩნდა, შესაძლოა გასხვისდეს. ადგილობრივი თვითმმართველობა ობიექტს აუქციონზე გასატანად ამზადებს.

გრიშაშვილის ქუჩა #4-ში არსებული ორსართულიანი ამორტიზებული შენობა ქუთაისის მერიის საკუთარებაშია. ადგილობრივ თვითმმართველობას ქონება, მათი მიმართვის შედეგად, ეკონომიკის სამინისტროსგან რამდენიმე თვის წინ გადაეცა.

ქუთაისის მერის მოადგილე ეკონომიკის საკითხებში - კოტე ქავთარაძე ამბობს, რომ ადგილი კომერციული თვალსაზრისით სტრატეგიული ობიექტია.

"არ დაველოდებით კონკრეტული პირის დაინტერესებას. მოვამზადებთ საკითხს და აუქციონზე გავიტანთ, დროებით საკუთარებაში გადასაცემად ან პირველ რიგში გასხვისების მიზნით", - ამბობს კოტე ქავთარაძე, რომელიც ირწმუნება, რომ ამ დროისთვის კონკრეტული ინვესტორი არ ჰყავთ.

მწერალთა კავშირის ქუთაისის ორგანიზაციის თავმჯდომარის თემურ ლანჩავას თქმით, გრიშაშვილის ქუჩაზე ორგანიზაცია დაახლოებით 50 წელია ფუნქციონირებს. მანამდე იქ მოსწავლე-ახალგაზრდობის სასახლე იყო განთავსებული.

დღეის მდგომარეობით მწერალთა კავშირს რამდენიმე ოთახი აქვს დაკავებული. შენობის ნაწილი სხვადასხვა ორგანიზაციაზე იჯარით არის გაცემული, ხოლო დანარჩენი ფართი დაკეტილია.

შენობის გასხვისების შემთხვევაში, მერის მოადგილის თქმით, შესაძლოა ინვესტორს ხელშეკრულებაში პირობა ჩაუდონ, იქ განთავსებულ ორგანიზაციებს რაღაც კუთხე მოუძებნონ ან მონაცვლეობა გაკეთდეს.

მწერალთა კავშირის შენობას ბოლო 30 წელია რემონტი არ ჩატარებია. მერის მოადგილის განმარტებით, იმ შემთხვევაში, თუკი საკუთარებაში არსებულ ქონებას ვერ გაყიდიან, ობიექტის რეაბილიტაციას თავად მოახდენენ.



შენობის გასხვისების საკითხი ქუთაისის მერიაში მას შემდეგ გააჟღერეს, რაც იქ რამდენიმე დღის წინ (20 ივლისს) ცეცხლი გაჩნდა.

მეორე დღეს, ქუთაისიპოსტისთვის ცნობილი გახდა, რომ მწერალთა კავშირის თავმჯდომარე თემურ ლანჩავა ქუთაისის მერის მრჩევლად დაინიშნა. შესაბამისი ბრძანება 13 ივლისით არის დათარიღებული.

რაც შეეხება ცეცხლის გამომწვევ მიზეზებს, მომხდართან დაკავშირებით შინაგან საქმეთა სამინისტროს გამოძიება არც დაუწყია.

როგორც შსს საზოგადოებასთან ურთიერთობის სამსახურის წარმომადგენელი ტატო კუჭავა "ქუთაისიპოსტთან" საუბარში ამბობს, სამართალდამცავებმა ადგილზე შეისწავლეს სიტუაცია, არ გამოიკვეთა დანაშაულის ნიშნები და შესაბამისად, არ დაწყებულა გამოძიება.