"დისკრიმინაციული ბრალდებები შეურაცხმყოფელია სკოლისთვის და იმ რეგიონისთვის, სადაც სკოლა ფუნქციონირებს."

საერთაშორისო სკოლების მიერ თურქეთის კონსულის საპასუხოდ გაკეთებულ განცხადებას ქუთაისის ნიკო ნიკოლაძის სკოლა–ლიცეუმიც უერთდება. მას, ასევე, ხელს საქართველოში მოქმედი ხუთი სასწავლო დაწესებულება რუსთავის "შოთა რუსთაველის სახელობის სკოლა-ლიცეუმი", მარნეულის "დავით აღმაშენებლის სახელობის სკოლა", თბილისის "ნიკოლოზ წერეთლის სახელობის საერთაშორისო სკოლა", თბილისის სკოლა-ლიცეუმი "სხივი" და ბათუმის რ. შაჰინის სახელობის სკოლა-ლიცეუმი "მეგობრობა" აწერენ.

ერთობლივ განცხადებაში სკოლები აცხადებენ, რომ ნებისმიერ პოლიტიკურ აქტივობას ემიჯნებიან. ისინი, ასევე, გმობენ მცდელობას გარე პოლიტიკური ძალები მიერ გამოყენებული იყვნენ იარაღად პოლიტიკურ ბრძოლაში. მათი აზრით, სასწავლო ინსტიტუტები გახლავთ აპოლიტიკური ორგანო, სადაც მთავარი ღირებულება განათლებული, თავისფლად მოაზროვნე და ჯანსაღი თაობის აღზრდაა.

"ვაცხადებთ, რომ ვგმობთ ნებისმიერი ტიპის იმიჯისა და რეპუტაციის შემლახველ განცხადებებსა და ბრალდებებს. ჩამოთვლილი სკოლებისთვის მიუღებელია სკოლის მოსწავლეების, პედაგოგებისა და მენეჯმენტის მოხსენიება ნებისმიერ პოლიტიკურ ჭრილში. განსაკუთრებით კი ჩვენი ერთ-ერთი სკოლის ხსენება ისეთ კონტექსტში როგორიცაა ტერორიზმი.

როგორც ცნობილია, გასული საუკუნის ბოლოს ორი ქვეყნის უერთიერთშეთანხმების საფუძველზე თურქული მხარის ინიციატივით თბილისში დაფუძნდა პირველი საერთაშორისო ტიპის სკოლა, რომლის უმთავრეს მიზანსაც წარმოადგენდა ორ ქვეყანას შორის მეგობრული ურთიერთობის განმტკიცება, განათლებისა და კულტურის გაზიარება.

20 წლის განმავლობაში ჩვენს საგანმანათლებლო სივრცეში გაიზარდნენ ღირსეული ქართველები, რომლებიც წარმატებით მოღვაწეობენ მსოფლიო ასპარეზზე. ამ წლების განმავლობაში ჩვენმა კურსდამთავრებულებმა დიდი როლი შეასრულეს ქვეყნის აღმშენებლობაში და დემოკრატიული ფასეულობების დაცვაში. ცნობისთვის, ჩვენს სასწავლო დაწესებულებებში სწავლება მიმდინარეობს საქართველოს განათლების სამინისტროს მიერ დამტკიცებული სასწავლო პროგრამის მიხედვით და სკოლების ფუნქციონირება რეგულირდება საქართველოს კანონმდებლობით.

გენერალური კონსულის მიერ გაკეთებულმა არაეთიკურმა გამონათქვამმა, რომელიც სკოლა-ლიცეუმ "მეგობრობის" მისამართით გაჟღერდა, შეურაცხყოფა მიაყენა მთელს გუნდს, მასწავლებლებს, მოსწავლეებს, მშობლებსა და კურსდამთავრებულებს. მსგავსი ტიპის დისკრიმინაციული ბრალდებები შეურაცხმყოფელია სკოლისთვის და მისი პარტნიორებისთვის და იმ რეგიონისთვის სადაც სკოლა ფუნქციონირებს," – აღნიშნულია საერთაშორისო სკოლების ერთობლივ განცხადებაში.

დემირელის სახელობის კოლეჯი და მისი პარტნიორი სკოლები მოითხოვენ დაცული იქნას თითოეული მოსწავლისა და მასწავლებლის კანონიერი უფლება, აღიკვეთოს დისკრიმინაციული ბრალდებები თურქეთის საკონსულოს მხრიდან და მოხდეს გაკეთებულ განცხადებაზე შესაბამისი რეაგირება.