"ჯორჯიან მანგანეზის" პრესსამსახურში განმარტავენ, რომ ორ მაღაროში, სადაც მუშაობა კვლავ შეჩერებულია, სარემონტო სამუშაობი მიმდინარეობს.

ჭიათურაში მანგანუმის მომპოვებელმა კომბინატმა ხუთთვიანი წყვეტის შემდეგ, მაღაროებში სამუშაოები 20 მაისს განაახლა. თუმცა, საწარმოო პროცესი 7-დან მხოლოდ ხუთ მათგანში აღდგა.

ადგილზე დასაქმებული მერაბ ჩინჩალაძე ამბობს, რომ ამ დროისთვის მუშაობა შეჩერებულ მაღაროებში მომუშავე ადამიანები სხვა საამქროებში არიან გადანაწილებული.

"უმუშევრად არავინაა დარჩენილი. მაგრამ, მე როგორც ვიცი, ვიდრე სამუშაოები შეჩერებული იყო, მაღაროებში მომუშავეები სხვაგან დასაქმდნენ, ამიტომ, როდესაც საწარმოო პროცესი განახლდა, ყველა აღარ გამოცხადებულა სამსახურში", - ამბობს მერაბ ჩინჩალაძე.

ჭიათურის მაღაროებში სამუშაოებს შპს "ჯორჯიან მანგანეზი" ახორცილებს. ადმინისტრაციის მონაცემებით, ამ დროისთვის მაღაროებში 3 400-მდე ადამიანია დასაქმებული.

კომპანიის საზოგადოებასთან ურთიერთობის სამსახურის უფროსი, ზაქარია ზალიკაშვილი განმარტავს, რომ მისთვის უცნობია, თუ რამდენი დასაქმებული გამოცხადდა სამუშაოებზე საწარმოო პროცესის განახლების შემდეგ.

"ვერაფერს გეტყვით დაზუსტებულად, რადგან მონაცემები ჩვენც გვინდა და კადრებს ვთხოვე სტატისტიკა. სავარაუდოდ, ეს ერთეული შემთხვევა იქნება", - ირწუნება ზალიკაშვილი.

ჭიათურის მაღაროებში, მიმდინარე წლის 11 იანვრიდან კომპანია "ჯორჯიან მანგანეზმა" 4 თვით მუშაობა შეწყვიტა. სამუშაოების შეწყვეტის მიზეზად ორგანიზაციამ საერთაშორისო ბაზარზე არსებული დაბალი ფასები და მათ მფლობელობაში არსებული მანგანუმის ჭარბი რაოდენობა დაასახელა.

 

მაღაროელებმა კომპანიის გადაწყვეტილება აქციებით გააპროტესტეს. ისინი სამუშაო პირობების გაუმჯობესებას და ხელფასების მომატებას ითხოვდნენ.

მაღაროებში სამუშაოების შეწყვეტას ჭიათურის მოსახლეობა ნეგატიურად შეხვდა. ადგილობრივების განცხადებით, მაღარო ქალაქის შემოსავლის ძირითადი წყაროა და ჭიათურის არსებობა მაღაროს გარეშე შეუძლებელია.

"ჯორჯიან მანგანეზის" პრესსამსახურში განმარტავენ, რომ ორ მაღაროში, სადაც მუშაობა კვლავ შეჩერებულია, სარემონტო სამუშაობი მიმდინარებს. რომელიც მათივე თქმით, რამდენიმე კვირაში დასრულდება.