შინაგან საქმეთა სამინისტროს იმერეთის პოლიციის დეპარტამენტის თანამშრომლებმა, წინასწარი შეთანხმებით ჯგუფის მიერ განსაკუთრებით დიდი ოდენობით ნარკოტიკული საშუალების უკანონო შეძენა-შენახვის,
რეალიზაციისა და რეალიზაციის ხელშეწყობის ბრალდებით ოთხი პირი დააკავეს. დაკავებულთაგან სამი უცხო ქვეყნის მოქალაქეა.

უწყების ინფორმაციით, მოსამართლის განჩინების საფუძველზე, სამართალდამცველებმა ერთ-ერთი დაკავებულისგან ნარკოტიკული საშუალების საკონტროლო შესყიდვა განახორციელეს და პროცესი ფარულად, აუდიო-ვიდეო ფორმით ჩაიწერა.

ბრალდებულების პირადი და დროებითი საცხოვრებელი სახლების ჩხრეკის, ასევე მათ მიერ მითითებული ადგილების შემოწმების შედეგად, პოლიციამ ნივთმტკიცებად განსაკუთრებით დიდი ოდენობით სხვადასხვა სახის ნარკოტიკული საშუალება ამოიღო. მათ შორის იყო 2 კილოგრამზე მეტი „მეთადონი“ და „მარიხუანა“.

პოლიციის ცნობით, ასევე ამოღებულია ნარკოტიკული საშუალებების დასაფასოებლად საჭირო მასალები და სავარაუდოდ ნარკოტიკული საშუალებების რეალიზაციით მიღებული თანხა.

გამოძიება სისხლის სამართლის კოდექსის 260-ე, 260-ე ტერცია და 260-ე კვარტა მუხლებით მიმდინარეობს. აღნიშნული მუხლები 20 წლამდე ან უვადო თავისუფლების აღკვეთას ითვალისწინებს.