18 წელი გავიდა 2008 წლის აგვისტოს ომიდან — ომიდან, რომელმაც არაერთი სიცოცხლე შეიწირა, ოჯახები დაანგრია და ათასობით ადამიანს საკუთარი სახლიდან წასვლა აიძულა.

 

რუსეთ-საქართველოს ომს ქუთაისიდან 10 ადამიანის სიცოცხლე შეეწირა.

ლევან კოხრეიძე, დავით ავალიანი, დიმიტრი ჯაილოვი, გივი სახელაშვილი, თამაზ ნიკიტინი, ირაკლი ჯანელიძე, მარლენ ბარამია, შიო სახელაშვილი, ფელექს კაკურიძე და გიგა გოგორიშვილი — ეს ის ადამიანები არიან, რომელთა სიცოცხლეც 2008 წლის აგვისტოს ომმა იმსხვერპლა.

აგვისტოს რუსეთ-საქართველოს ომს საქართველოს თავდაცვის სამინისტროს 170 მოსამსახურის, შინაგან საქმეთა სამინისტროს 14 თანამშრომლისა და 224 სამოქალაქო პირის სიცოცხლე ემსხვერპლა.

დაჭრილ და დაშავებულ სამოქალაქო და სამხედრო პირთა რაოდენობამ ჯამში 2 232 შეადგინა, მათ შორის 1 045 სამხედრო მოსამსახურე იყო.

იძულებით გადაადგილებულ პირად იქცა 150 ათასი ადამიანი, რომელთაგან დაახლოებით 30 ათასი დღემდე დევნილობაში ცხოვრობს.

დღეს, საქართველოს ტერიტორიების 20% კვლავ ოკუპირებულია რუსეთის მიერ.

აგვისტოს ომის შემდეგ რუსეთმა საქართველოს ორი რეგიონის - აფხაზეთისა და „სამხრეთ ოსეთის“ დამოუკიდებლობა აღიარა, მაგრამ საერთაშორისო საზოგადოება საქართველოს ტერიტორიული მთლიანობის მხარდამჭერად რჩება.