საქართველოს მთავრობამ სოციალურად დაუცველთა ერთიანი ბაზიდან იმ ოჯახების ამორიცხვა დაადგინა, რომელთა ერთ წევრზე გაანგარიშებული ყოველთვიური შემოსავალი 1250 ლარს ან მეტს შეადგენს.

შესაბამის დადგენილებას პრემიერ-მინისტრმა ირაკლი კობახიძემ 7 მაისს მოაწერა ხელი.

დოკუმენტის მიხედვით, თუ მონაცემთა ბაზაში რეგისტრირებული ოჯახის მიერ ხელფასის სახით მიღებული დასაბეგრი შემოსავალი ბოლო 3 თვის განმავლობაში, შემოსავლების სამსახურის მონაცემებით, ოჯახის თითო წევრზე თვეში 1250 ლარს გაუტოლდება ან გადააჭარბებს, ოჯახს სოციალურად დაუცველთა ბაზაში რეგისტრაცია შეუწყდება დამატებითი სოციალურ-ეკონომიკური შეფასების გარეშე.

ამ გადაწყვეტილებას წინ უსწრებდა მთავრობის მიერ დაახლოებით ორი თვის წინ დაანონსებული სოციალური სისტემის გადახედვა.

ჯანდაცვის მინისტრის მიხეილ სარჯველაძის განცხადებით, მიზანია, ბაზაში დარჩნენ მხოლოდ ის ოჯახები, რომლებიც რეალურად საჭიროებენ სახელმწიფო დახმარებას.

მისი თქმით, არსებობდა შემთხვევები, როდესაც დახმარების მიმღებ ოჯახებს მაღალი შემოსავლები ან დამატებითი ფინანსური რესურსები უფიქსირდებოდათ.

სოციალური მომსახურების სააგენტოს მონაცემებით, 2026 წლის იანვრის მდგომარეობით საქართველოში შემწეობას ჯამში 710 226 ადამიანი იღებდა.

იანვრის მონაცემებით, იმერეთში სოციალურ შემწეობას 48 830 ადამიანი იყო მიმღები.