24 დეკემბერს, ჭიათურაში დაკავებულების სასამართლო პროცესი გაიმართება, სადაც მაღაროელები და მათი უფლებადამცველები საბოლოო სიტყვას იტყვიან.
პროცესი, ქუთაისის საქალაქო სასამართლოში, 11:30 საათზე დაიწყება.

მაღაროელები, რომლებიც თვეებია უწყვეტ პროტესტში არიან ამბობენ, რომ ამ დღეს სასამართლოზე დასწრება ძალიან მნიშვნელოვანია, განსაკუთრებით მაღაროში დასაქმებულებისთვის.

"განსაკუთრებით მოგმართავთ მაღაროელებს — მობრძანდით და დაესწარით პროცესს, რათა საკუთარი ყურით მოისმინოთ, რას იტყვიან ჩვენი უსამართლოდ დაკავებული ბიჭები. მათ ახლა თქვენი მხარდაჭერა, როგორც არასდროს, ისე სჭირდებათ.

აქვე გიზიარებთ ანგარიშის ნომერს. მოვახდინოთ თანხების მობილიზება აუცილებელი საჭიროებებისთვის, საწვავისთვის და ბიჭებისთვის. მხარდაჭერა უსამართლოდ დაკავებულ ბიჭებს. #GE40BG0000000604733786GEL",- ამბობენ ისინი.

მაღაროელები: მერაბი სარალიძე, აჩიკო ჭუმბურიძე, გიორგი ნეფარიძე და თენგო გველესიანი, 29 აპრილს, გამთენიისას, დააკავეს. შსს-ს ინფორმაციით, ბრალდებულები შუქრუთის მაღაროს დირექტორს ფიზიკურად დაუპირისპირდნენ და სხეულის სხვადასხვა არეში დაზიანება მიაყენეს.

აღსანიშნავია, რომ მოცემულ საქმეზე გამოძიება თავდაპირველად საქართველოს სისხლის სამართლის კოდექსის 118-ე მუხლის მე-2 ნაწილით გათვალისწინებული დანაშაულის, ჯგუფურად, ჯანმრთელობის განზრახ ნაკლებად მძიმე დაზიანების მუხლით დაიწყო, თუმცა 2025 წლის 30 აპრილს მერაბ სარალიძეს და გიორგი ნეფარიძეს ბრალი სისხლის სამართლის 225-ე მუხლით დაუმძიმდათ, რაც ჯგუფური ძალადობის ორგანიზებას და მასში მონაწილეობას გულისხმობს და 6-დან 9 წლამდე პატიმრობით ისჯება.

ჭიათურელი მაღაროელები ცხრა თვეა, უწყვეტად აპროტესტებენ კომპანიის მიერ მათი შრომითი უფლებების მძიმე დარღვევებს, მათ შორის, ხელფასების გადაუხდელობას, უკანონო რეორგანიზაციასა და თანამშრომლების მასობრივ გათავისუფლებას. მაღაროელების მოთხოვნებს ახლა უკვე დაემატა ოთხი დაკავებულის გათავისუფლებაც.