"2008 წლის ომმა მკაფიოდ დაგვანახა ევროპასთან ურთიერთობის აუცილებლობა"


ქუთაისის დემოკრატიული ჩართულობის ცენტრში,მედიისა და არასამთავრობო სექტორისთვის, ევროკავშირის მიმართ ცნობიერების ამაღლების მიზნით, ტრენინგი ჩატარდა.

რა შეცვალა ევროკავშირმა წევრი სახელმწიფოების ცხოვრებაში, რატომ არის პრინციპულად მნიშვნელოვანი ევროპული არჩევანი და რას გულისხმობს ევროპული მომავალი?-ამ საკითხებზე "საქართველოს უსაფრთხოებისა და განვითარების ცენტრის" წარმომადგენლებმა კონკრეტული მაგალითებით ისაუბრეს.

მომხსენებლები მიიჩნევენ, რომ მთავარია სწორად განვსაზღვროთ რა ეტაპზე ვართ ევროკავშირი-საქართველოს ურთიერთობების პროცესში და რა პერსპექტივები გვაქვს.

"ჩვენი მიზანია, მედიისა და არასამთავრობო ორგანიზაციების საშუალებით, რაც შეიძლება მკაფიო ინფორმაცია მივაწოდოთ საზოგადოებას იმის შესახებ, თუ რა არის ევროკავშირი", - ამბობს "საქართველოს რეფორმების ასოციაციის" პროექტების მენეჯერი, მკვლევარი გიორგი გოგუაძე.

შეხვედრაზე მომხსენებლებმა ევროკავშირთან ასოცირების ხელშეკრულების შესრულებულ და შესასრულებელ პუნქტებზე ისაუბრეს. მათი თქმით, ვიზალიბერალიზაცია, რომელიც მიმდინარე წლის ზაფხულიდან შენგენის ქვეყნებში უვიზო მიმოსვლას გულისხმობს, უმნიშვნელოვანესი ეტაპია საქართველოსთვის.

რაც შეეხება გრძელვადიან გეგმებს, ეკონომიკურად სტაბილური ზრდის გარანტიებზე მომხსენებლებმა ევროკავშირის წევრი ორი ქვეყნის მაგალითზე ისაუბრეს. მათი თქმით, მოლდოვის ორგანიზაციაში მიღებასთან დაკავშირებით მსჯელობა დიდი ხნის განმავლობაში მიმდინარეობდა, მაგრამ დღეს ის სხვა წევრ სახელმწიფოებს გაუთანაბრდა.

იგივე მაჩვენებლები აქვს ესტონეთსაც, რომელმაც შეძლო და მკვეთრად გააუმჯობესა ეკონომიკა.
რაც შეეხება საქართველო-ევროკავშირის ურთიერთობებს, ჩვენი ქვეყნისა და ორგანზიაციის დაახლოება 1991 წლიდან დაიწყო, უფრო მჭიდრო ურთიერთობებზე კი საქართველო 2003 წლიდან გადავიდა.

"2008 წლის ომმა მკაფიოდ დაგვანახა ევროპასთან ურთიერთობის აუცილებლობა. რუსეთი ყოველთვის თამაშობდა კატალიზატორის როლს ჩვენსა და ევროპას შორის და ახლა, როცა უამრავი დაინტერესებული ადამიანია, რომ სხვა მიმართულებით წაიყვანოს საზოგადოების ინტერესი, განსაკურებით მნიშვნელოვანია სწორი წარმოდგენა შევუქმნათ საზოგადოებას ევროკავშირზე",-ამბობს გიორგი გოგუაძე.

ტრენინგი ორდღიანია. მეორე ეტაპი ჩრდილო ატლანტიკური ალიანსის მნიშვნელობასა და პერსპექტივებს დაეთმობა.