თერჯოლის სოფელ ზედა საზანოში, უბედური შემთხვევისას გადარჩენილი პირის ჯანმრთელობის მდგომარეობა სტაბილურია.
ის კლინიკიდან უკვე გაწერეს.

ექიმის თქმით, დაშავებულს ჰიპოთერმია და სხეულის ზოგადი დაჟეჟილობა აღენიშნებოდა.

თერჯოლის მუნიციპალიტეტში, მდინარე ძუსაში, 4 ადამიანი დაიხრჩო. შემთხვევა ორი დღის წინ მოხდა. 

ე.წ. ქადაგიძის რაფის ჩანჩქერის მოსანახულებლად რამდენიმე ადამიანი იმყოფებოდა. ერთ-ერთს ქვაზე ფეხი დაუცურდა და წყალში ჩავარდა. დახმარების მიზნით, მდინარეში მისი თანმხლები პირებიც ჩავიდნენ. სანაპიროზე მხოლოდ ერთი ადამიანი დარჩა, სწორედ მან დარეკა 112-ში.

მაშველებმა, სამძებრო-სამაშველო ღონისძიების შედეგად, მხოლოდ ერთი პირის გადარჩენა შეძლეს.

შინაგან საქმეთა სამინისტრომ მომხდარზე გამოძიება სისხლის სამართლის კოდექსის 116-ე მუხლით დაიწყო, რაც გაუფრთხილებლობით სიცოცხლის მოსპობას გულისხმობს.