გარემოს ეროვნული სააგენტოს მოკლევადიანი პროგნოზების სამმართველოს უფროსის დოდო გვაზავას ინფორმაციით, დასავლეთ საქართველოში, 23 თებერვლამდე, ძირითადად, ნალექიანი ამინდებია მოსალოდნელი.
მისივე თქმით, დღეს, 19 თებერვალს, უმეტეს რაიონში ნარჩუნდება ნალექი, დაბლობში - წვიმა, მთიან რაიონებში - თოვლჭყაპი, მთაში კი - თოვლი. ხვალ, 20 თებერვალს კი ნალექის ინტენსივობა დაიკლებს.

"19-20 თებერვალს ჰაერის მაქსიმალური ტემპერატურა დაბლობ რაიონებში 6-11 გრადუსი დაფიქსირდება, მთიანში - 3-8 გრადუსი, ხოლო მაღალმთაში - 1-6 გრადუსი სითბო. 21 თებერვალს ერთდღიანი გამოდარება გვაქვს, ჰაერის ტემპერატურა 15-17 გრადუსამდე მოიმატებს. 22 თებერვალს ღამის საათებიდან 23-ის დილის საათებამდე კი უმეტეს რაიონში კვლავ ნალექია მოსალოდნელი",- განმარტავს დოდო გვაზავა.

მისივე თქმით, 23 თებერვლიდან 28 თებერვლის ჩათვლით საქართველოში გამოიდარებს და ჰაერის ტემპერატურა 22 გრადუსამდე დაიწყებს მომატებას. 25-26 თებერვალს კი აღმოსავლეთის მიმართულების ქარის გაძლიერებაა მოსალოდნელი.