ესკიზები, რომლის მიხედვითაც ქუთაისის ცენტრალური ბულვარის რეკონსტრუქცია უნდა განხორციელდეს, ცნობილია.
აღსანიშნავია, რომ პროექტის ესკიზები მას შემდეგ გასაჯაროვდა, რაც "ქუთაისიპოსტმა" მასალა გამოაქვეყნა, სადაც საუბარი იყო, ბულვარის სარეაბილიტაციოდ შემოღობვაზე, მაშინ როცა, მგფ-ს პროექტი მზად ჯერ არ ჰქონდა.  სამაგიეროდ, კი უკვე იცოდნენ ჯერარდაწყებული სამუშაოების დასრულების თარიღი და თანხა.  

მუნიციპალური განვითარების ფონდმა პარკის შემოღობილ სივრცეზე შესაბამისი ფოტოები გამოაკრა, თუმცა სამუშაოები ჯერ არ დაწყებულა. 



ესკიზური პროექტის მიხედვით, ბულვარში შეხვედრებისთვის განკუთვნილი სივრცე და მედიათეკა მოეწყობა.

ის, სავარაუდოდ, კაფე-ბარ "სავანეს" ადგილას განთავსდება.





მულტიფუნქიური შეხვედრების ადგილისა და მედიათეკას გვერდით იქნება საზაგადოებრივი საპირფარეშოც.



იგეგმება ბულვარში განთავსებული ზ. ფალიაშვილის, ა.წერეთლის, დები იშხნელებისა და 9 აპრილის ქანდაკებების, ასევე კოლონადების გაწმენდა-რესტავრაციაც.

ესკიზების მიხედვით, დაგეგმილია გვირილობის მოედნის მარადმწვანე მცენარეებით გამწვანება და ბულვარში ვარდების ხეივანის გაშენებაც.





დაგეგმილია ახალი ძელსკამების, სანათების, ნაგვის ურნებისა და ბორდიურის განთავსებაც.

სამუშაოების გენ-გეგმა

ქუთაისის ცენტრალური ბულვარი, სარეკონსტრუქციოდ, იანვარში შემოღობეს, თუმცა ჯერჯერობით სამუშაოები არ დაწყებულა. დაახლოებით ორი კვირის წინ, მუნიციპალური განვითარების ფონდში (რომელიც ბულვარს აკეთებს) განგვიმარტეს, რომ საპროექტო-სახარჯთაღრიცხვო დოკუმენტაციის მომზადება მიმდინარეობდა. 

მათივე ინფორმაციით, ქუთაისის ცენტრალური ბულვარის რეკონსტრუქციისთვის დაახლოებით 15 მილიონამდე დაიხარჯება და სამუშაოები წლის ბოლოსთვის უნდა დასრულდეს.

პროექტის ესკიზები მას შემდეგ გასაჯაროვდა, რაც "ქუთაისიპოსტმა" მასალა გამოაქვეყნა, სადაც საუბარი იყო, რომ ბულვარის სარეაბილიტაციოდ შემოღობვა ისე მოხდა, მგფ-ს პროექტი მზად ჯერ არ ჰქონდა, სამაგიეროდ კი უკვე იცოდნენ ჯერარდაწყებული სამუშაოების დასრულების თარიღი და მისთვის განსაზღვრული მილიონობით თანხა. 

ბულვარის რეკონსტრუქციას მუნიციპალური განვითარების ფონდი ახორციელებს, სამუშაოებს კი შპს „დაგი" შეასრულებს, რომელმაც პარკის კეთილმოწყობისთვის გამოცხადებულ ტენდერში [NAT220025121] გაიმარჯვა.

სატენდერო დოკუმენტაციის თანახმად, სამუშაოები გასულ წელს უნდა დაწყებულიყო, თუმცა როგორც მგფ-ში განმარტავდნენ, ბაღში განთავსებული ნაგებობის, (კაფე-ბარ ,,სავანეს’’) გამო ვერ ხერხდებოდა, რის შედეგადაც საქმეში მერიაში ჩაერია და საქალაქო სასამართლოში განხორციელებული დავების შედეგად, უკვე გასული წლის 27 დეკემბერს ,,სავანე’’ დაანგრია.

ქალაქის ცენტრალური ბულვარის რეკონსტრუქცია 2018 წელს, ქალაქის მაშინდელი მერის გიორგი ჭიღვარიას დაპირება იყო. დაპირებიდან ერთი წლის შემდეგ, მერიამ ბულვარის რენდერ ვერსია ფეისბუკის ოფიციალურ გვერდზე გამოაქვეყნა, სადაც მოქალაქეებს მათ მიერ მოწონებული ესკიზისთვის ხმა უნდა მიეცათ, თუმცა პროექტის საბოლოო ვარიანტის შემუშავება არ მოხდა.

ქუთაისის ცენტრალური ბაღი 1821 წელს გაშენდა. ის მუშტაიდის პარკის შემდეგ, სიძველით, მეორეა მთელს ამიერკავკასიაში. ბულვარში სარეკონსტრუქციო სამუშაოები ეტაპობრივად ხორციელდებოდა, თუმცა, მისი არსებობის განმავლობაში, სრული რეკონსტრუქცია არ მომხდარა.


ამავე თემაზე:

ცენტრალური ბულვარის სამუშაოების დასრულების ვადა ცნობილია, პროექტი კი ჯერ მზად არ არის

ქუთაისის ცენტრალური ბულვარის სარეკონსტრუქციო სამუშაოები დაიწყო

"ქუთაისის ცენტრალური ბაღის რეკონსტრუქცია იწყება და პროექტი ჯერ არ გასაჯაროვებულა’’

"სამუშაოების დასაწყებად დავალება არ გაცემულა" - ქუთაისის ბულვარის რეკონსტრუქციის თარიღი კვლავ უცნობია

რამდენიმეწლიანი დაპირების შემდეგ ქუთაისის ცენტრალური ბულვარის რეკონსტრუქცია იწყება