ახალი ამბები
"სატრანსფორმატორო პუნქტი წყალში დგას, შეიძლება, დენმა დაგვარტყას’’ - ავტოქარხნის მცხოვრებლები
FaceBook
ქუთაისში, ზ.ჭავჭავაძის ქუჩაზე მდებარე მაღალი ძაბვის სატრანსფორმატორო პუნქტში, რომელიც მოსახლეობას ელექტროენერგიით ამარაგებს, სავარაუდოდ, უსაფრთხოების ნორმები დარღვეულია. 
მაღალი ძაბვის პუნქტი მოსახლოებასთან ახლოს  არის განთავსებული, ისე რომ შემოსაზღვრულიც კი  არ არის. 

"ამ პუნქტთან ახლოს, 9-სართულიან კორპუსში ვცხოვრობ. მცირეწლოვანი შვილი მყავს და სულ მეშინია შენობას არ მიუახლოვდეს, რადგან ამ შენობის წინ წყალი დგას, წყალი კი ელექტროენერგიის გამტარია. ობიექტთან ახლოს სველ მიწაზე რომ ფეხი დააბიჯოს, შეიძლება უბედურება მოხდეს. შიშით გული მისკდება, როცა აქ ბავშვები თამაშობენ", - მბობს ზ.ჭავჭავაძის ქუჩის ერთ-ერთი მცხოვრები.

მაღალი ძაბვის სატრანსფორმატორო პუნქტი

"შენობა შემოსაზღვრულიც არ არის. არადა, აქ მაღალი ძაბვა შედის და მართლა საშიშია. აქვე ახლოს კომერციული ობიექტები და საცხოვრებელი კორპუსებია. უამრავი ადამიანი დადის და მაინცდამაინც ვინმე უნდა იმსხვერპლოს, რომ ზომები მიიღონ?,'' -ამბობს  ახლოს მდებარე საცხოვრებელ კორპუსში მცხოვრები საბა ბენდელიანი. 

უსაფრთხოების სისტემების სპეციალისტის ლევან იოსელიანის თქმით კი, საფრთხე დიდია, რადგან შენობა არასწორ ადგილზე არის განთავსებული.  

"მაღალი ძაბვის სატრანსფორმატორო პუნქტი აუცილებლად შემაღლებულ ადგილზე უნდა აშენდეს, სადაც ერთი წვეთი წყალი არ შევა. ასევე, აუცილებელია, რომ შენობა იყოს შემოღობილი და მასთან გარეშე პირს ხელი არ მიუწვდებოდეს.  სხვა შემთხვევაში, შესაძლოა, სავალალო შედეგი დადგეს. ადამიანს ფეხსაცმელი სველი რომ ჰქონდეს და 50 მეტრით პუნქტს მიახლოვდეს, ლეტალური შედეგი დადგება", - ამბობს ლევან იოსელიანი.


მისი თქმით, შენობა ელექტრომაგნიტური გამოსხივების მხრივაც სახიფათოა. როგორც ლევან იოსელიანი განმარტავს, ასეთი პუნქტები მოსახლეობისგან 20-30 მეტრით მაინც უნდა იყოს დაშორებული.

ავტოქარხნის მაჟორიტარი დეპუტატი მიხეილ გიორგაძე კი ამბობს, რომ აღნიშნული პრობლემის შესახებ ინფორმაციას არ ფლობს, თუმცა საკითხით დაინტერესდება.

"საკმაოდ მწვავე პრობლემა ჩანს. დღესვე გავალ ადგილზე და ვნახავ. საქმის კურში მერიას და ენერგო-პროსაც ჩავაყენებ,’’ - ამბობს მიხეილ გიორგაძე.

ზ. ჭავჭავაძის ქუჩაზე მდებარე მაღალი ძაბვის სატრანსფორმატორო  პუნქტი "ენერგო-პრო ჯორჯიას'' ეკუთვნის. კომპანიაში გვითხრეს, რომ აღნიშნული პუნქტი მოსახლეობას საფრთხეს არ უქმნის, რადგან გამანაწილებელი მოწყობილობები იზოლირებულია. 
Print