ქუთაისში, მთავარი ნაძვის ხის საზეიმოდ ანთების შემდეგ, ინციდენტი მოხდა.
ერთმანეთს კაფე-ბარ „სავანეს“ ერთ-ერთი მეპატრონე გიორგი ტურაბელიძე და ქუთაისის მერი იოსებ ხახალეიშვილი დაუპირისპირდნენ. 

როგორც სოციალურ ქსელში გავრცელებულ ინციდენტის ამსახველ ვიდეოში ჩანს, ძმები ტურაბელიძეები ქალაქის მერისგან კითხვებზე პასუხების მიღებას ცდილობდნენ, რაზედაც ხახალეიშვილი გაბრაზდა და გიორგი ტურაბელიძეს საზოგადოებრივ სივრცეში სიტყვიერი შეურაცხყოფა მიაყენა. 



„სავანეს“ მეპატრონის თქმით, ქალაქის მერმა მას არაკაცი და არამზადა უწოდა, რაზედაც სიტყვიერი პასუხი მიიღო, შემდეგ კი ფიზიკურად იძალადა.

"ჩვენთვის, ქუთაისელებისთვის, მერი უკვე მიუწვდომელი პიროვნება გახდა. ქალაქს და მოსახლეობას აქვს ლეგიტიმური კითხვები, რაზედაც მისგან პასუხების მიღება მერიის შენობაში შეუძლებელი გახდა, ამიტომ გვიწევს სადაც ვნახავთ, იქ დავუსვათ ეს კითხვები, რაც ძალიან აბრაზებს, გამოჰყავს წყობიდან და მისი პასუხი არის ერთი: გინება და შემდეგ, ფიზიკური შერაცხყოფის მოყენება. ამ ყველაფერზე, მას აუცილებლად მოუწევს პასუხისმგებლობის აღება",- განმარტავს გიორგი ტურაბელიძე. 

ძმები კაფე/ბარ "სავანეს" დანგრევასთან დაკავშირებით კითხვებზე პასუხების მიღებას ქუთაისის მერისგან დიდი ხანია ცდილობენ. ტურაბელიძეები მერის ნახვის მოთხოვნით მერიაში არაერთხელ მივიდნენ, თუმცა უშედეგოდ. 

ქუთაისის მერიასა და ,,სავანეს’’ მფლობელებს შორის სასამართლო დავები 13 ოქტომბრიდან მიმდინარეობდა. მერია კაფის დემონტაჟს და მეპატრონეებისგან 200 ათას ლარამდე საიჯარო დავალიანების გადახდას ითხოვდა. 16 ნოემბერს ქუთაისის საქალაქო სასამართლოს მოსამართლემ დარინა აბულაძემ კვების ობიექტის დანგრევის გადაწყვეტილება მიიღო. რაც შეეხება მეპატრონეებისგან საიჯარო თანხის გადახდას, ამ ნაწილში მერიის მოთხოვნა არ დაკმაყოფილდა.