არასამთავრობო ორგანიზაცია „ევროპა ჩვენი სახლიას“ წევრებმა ქუთაისში, აღმაშენებლის ქუჩაზე არსებული მწვანე სექტორის განადგურება გააპროტესტეს.

მათი განცხადებით, ასსაფეხურიან კიბესთან მდებარე ფერდი, რომელიც მსხვილმერქნიანი კედარის ჯიშის ხეებით იყო დატვირთული, ფაქტობრივად, აღარ არსებობს.

დამუშავებული მასალის ნაწილი კი ახლადაშენებული სასტუმროს "ქუთაისი ინნ"-ის ეზოშია დაწყობილი.

„ეს არის ვერაგული აქტი. მოჭრილია 25-ზე მეტი ზრდასრული კედარი, რომლის ასაკიც არანაკლებ 80 წლისა, თუ 100 არა. გამოვიდა არაოფიციალური ინფორმაცია, რომ ხეები გამხმარი იყო და ამიტომ გაჩეხეს, თუმცა ერთი რომ, ეს ხე არ ზიანდება და მეორეც, აქედან 25 მეტრშიც არის კედრის ხეებია, რომელიც არ გამხმარა და ესინი გახმა? ეს არის მძიმე დანაშაული. ჩვენ კვლევას ვაწარმოებთ და შედეგთან აუცილებლად მივალთ“,- ამბობს „ევროპა ჩვენი სახლიას“ დამფუძნებელი მერაბ ბარათაშვილი.



ორგანიზაციის წევრები მიიჩნევენ, რომ ეს არის მავნებლური კოლაბორაცია მსხვილ ბიზნესსა და სახელმწიფოს შორის, რომელიც ქალაქის ინტერესების დაზიანებისკენაა მიმართული.

მათივე ინფორმაციით, აღნიშნული პერიმეტრის მფლობელი სახელმწიფოა, ხოლო მოიჯარე - „ინნ“ ჯგუფის სასტუმროების ქსელი.

„ეს არის ბარბაროსული აქტი, რომელიც განხორციელდა „ინნ“ ჯგუფისა და „აქტივების მართვისა და განვითარების კომპანიის“ თანამშრომლობის სახით. სამწუხაროდ, ამ აქტის უკან, ჩვენ მოვიაზრებთ ქალაქის მერსაც, რადგან მას დღემდე არ გაუკეთებია განცხადება ამ თემაზე, არც საკრებულოს თავმჯდომარეს. ქალაქის ცენტრალურ ნაწილში განადგურებულია ძალიან დიდი მწვანე ზოლი, რომელიც ასევე ეკოლოგიურ კატასტროფას უქმნის ქალაქის მოსახლეობას“,- განმარტავს ორგანიზაციის წარმომადგენელი გია გოქაძე.

მისივე თქმით, ამიერიდან, ეროზიის რისკების გათვალისწინებით, ფერდის მდგრადობა კითხვის ნიშნის ქვეშ დგება, ეს კი ქვეყანაში არსებული მძიმე გარემოსდაცვითი გამოწვევების ფონზე ხდება.

„ევროპა ჩვენი სახლიას“ წევრები ქუთაისის მერიისგან განმარტებას ითხოვენ, თუ რა მიზანს ემსახურება ვანდალიზმის ეს გამოხატულება ქალაქში, სადაც მწვანე სექტორის განადგურების ხარჯზე, "ხელისუფლებასთან დაახლოებული ბიზნესების ინტერესთა დაკმაყოფილება აპრობირებული პრაქტიკაა“.

„მოვითხოვთ ქალაქის მერისგან პასუხის გაცემას, რატომ იქნა განადგურებული 30-მდე კედრის უნიკალური ჯიშის ხე და რა პასუხისმგებლობას აკისრებენ იმ ორგანიზაციას, რომელმაც ეს ბარბაროსული აქტი განახორციელა“,- აცხადებს გია გოქაძე.

საკითხთან დაკავშირებული სასტუმროს დირექტორი რევაზ თავართქილაძე გვეუბნება, რომ კითხვებით სახელმწიფოს ქონების ეროვნული სააგენტოს „აქტივების მართვისა და განვითარების კომპანიას“ უნდა მივმართოთ, ვინც ამ მიწის მესაკუთრეა.

„და თუ ჩვენგან რამე გაინტერესებთ, მოგვმართეთ წერილობით და მერე გაგცემთ პასუხს“,- ამბობს თავართქილაძე.

"ქუთაისიპოსტმა" დაკავშირება „აქტივების მართვისა და განვითარების კომპანიასთანაც“ სცადა, თუმცა ჩვენს ზარებს არ პასუხობენ.