„ჩვენს ქვეყანაში დეცენტრალიზაციის პრობლემაა, ონში რომ ხდება რაღაც, ონს უნდა ჰქონდეს ცენტრი, რომელიც ამის შესახებ ინფორმაციას გასცემს ან რეაგირებას მოახდენს, ყველა მუნიციპალიტეტს გეოლოგიური სამსახური უნდა ჰქონდეს“.

ამის შესახებ დედამიწის შემსწავლელ მეცნიერებათა ინსტიტუტისა და სეისმური მონიტორინგის ეროვნული ცენტრის დირექტორმა, თეა გოდოლაძემ " განაცხადა.

თეა გოდოლაძის თქმით, ქვეყანას რეგიონული მონიტორინგის სისტემები უნდა ჰქონდეს და გეოლოგები მუდმივად აკონტროლებდნენ პროცესებს.

"ლამაზი ქვეყანა გვაქვს, მაგრამ სამწუხაროდ, თამამად შეგვიძლია ვთქვათ, რომ მსოფლიოში ერთ-ერთი ყველაზე ცუდი გეოლოგიის მატარებელი ქვეყანაა. სახეზეა ყველა კატასტროფული მოვლენა, რაც შეიძლება მოხდეს: ღვარცოფების განვითარება, მეწყრების განვითარება, მიწისძვრები და ა.შ. ამიტომ პრევენციაზე, როდესაც ვლაპარაკობთ, ჩვენ ვლაპარაკობთ მონიტორინგზე. თბილისის ცენტრიდან კი არ უნდა იმართებოდეს მონიტორინგის სისტემები, რეგიონული მონიტორინგის სისტემები უნდა გვქონდეს, როდესაც გეოლოგები მუდმივად აკონტროლებენ პროცესებს. 21-ე საუკუნეა, განვითარებულია სატელიტური ტექნოლოგიები, სახმელეთო-რადარული ტექნოლოგიები. უამრავი ტექნოლოგიაა, რომელიც კომპლექსში პრობლემის იდენტიფიცირების საშუალებას გვაძლევს და საფრთხის შესახებ გარკვეული ალბათობით შეგვიძლია ვისაუბროთ. მიწისძვრა სხვა საკითხია და ამის პროგნოზირება შეუძლებელია, მაგრამ, როდესაც კლიმატურ პრობლემებზე გვაქვს ლაპარაკი, აქ შესაძლებელია გარკვეული ალბათობით და გარკვეული დროის პერიოდში მსგავსი პრობლემების იდენტიფიცირება და განსაზღვრა.

ეს არის გლობალური დათბობის შედეგად გამოწვეული პრობლემები, როდესაც ხდება მყინვარის სწრაფი დნობა. ტბებიც ჩნდება და შემდეგ ეს ტბები გრავიტაციით ქვემოთ მოდის. ხდება მყინვარული მდინარეების ადიდება. გავიხსენოთ 2017 წლის მესტია-ჭალის პრობლემები, გავიხსენოთ 2018 წლის ნენსკრა... პრობლემა მოკლე მეხსიერებაა", - განაცხადა თეა გოდოლაძემ.

შოვში, მეწყერი 3 აგვისტოს ჩამოწვა. სტიქიის ზონიდან, ამ დროისთვის, 210 ადამიანია გამოყვანილი, მაშველებმა კი 11 ადამიანის ცხედარი იპოვეს.


bpn.ge