2023 წლის მაისის თვეში, დავით აღმაშენებლის სახელობის აეროპორტით 126 864 მგზავრმა ისარგებლა.

პანდემიამდელ პერიოდთან შედარებით, ქუთაისის საერთაშორისო აეროპორტში, ეს მგზავრთნაკადის რეკორდული მაჩვენებელია (გაზრდილია 96%-ით).

საქართველოს აეროპორტების გაერთიანების ინფორმაციით, მგზავრთნაკადის გარდა, ისტორიულ მაქსიმუმს მიუახლოვდა აეროპორტიდან განხორციელებული ავიარეისების რაოდენობაც.

„პანდემიამდე, 2019 წლის მაისში, 210 რეისი შესრულდა. 2023 წლის ანალოგიურ პერიოდში კი რეისების რაოდენობა 80% გაიზარდა და ქუთაისის აეროპორტი 378 რეისს მოემსახურა“-, განმარტავენ აეროპორტების გაერთიანებაში.

აღსანიშნავია, რომ მიმდინარე წლის პირველი ივნისიდან ავიაკომპანია WIZZ AIR-მა ქუთაისის აეროპორტში მესამე ბაზირებული ხომალდი დააბრუნა და რეგულარულ რეისებს მადრიდის, ბრიუსელის, ფრანკფურტის, ჰამბურგისა და პოზნანის მიმართულებით ასრულებს. 4 ივნისიდან კი ყაზახურმა დაბალბიუჯეტურმა ავიაკომპანია FlyArystan-მა ალმათი-ქუთაისი-ალმათის მიმართულება დაამატა.

2023 წლის პირველ დეკემბერს ქუთაისის საერთაშორისო აეროპორტს Wizz AIr-ის მეოთხე ბაზირებული ხომალდი და კოპენჰაგენის მიმართულებაც დაემატება.

ამ ეტაპისთვის, ქუთაისის აეროპორტიდან ხუთი ავიაკომპანია ოპერირებს. რეისები 17 ქვეყნის 34 მიმართულებით სრულდება.