ქუთაისის მერიამ ხახანაშვილის ქუჩაზე მიტოვებული სარეაბილიტაციო სამუშაოების შემსრულებელი კომპანია გასული წლიდან მოყოლებული ამ დრომდე ვერ გამოავლინა. 

მერიამ, კომპანიების დაინტერესების მიზნით, მესამედ გამოცხადებულ ტენდერში (NAT230002884) სამუშაოების ღირებულება თავდაპირველ ფასთან შედარებით, 60 784  ლარით გაზარდა. შესაბამისად, ხახანაშვილის ქუჩის კეთილმოწყობისთვის 280 000 ლარია გათვალისწინებული. 

„პროექტზე გასულ წელს ტენდერი გამოცხადდა შესაბამისი ფასებით. რადგან შარშანდელი პროექტის ნაშთი ღირებულებით ტენდერი არ შედგა, განხორციელდა სამუშაოების ღირებულების გადაფასება მიმდინარე ფასებით“- განმარტავენ მერიის პრესსამსახურში.

"შესაბამისი ფასი" პირველ ჯერზე გამოცხადებულ ტენდერში 219 216 ლარს შეადგენდა, რომლის სანაცვლოდაც უნდა მომხდარიყო აღნიშნული ქუჩაზე გზის საფარის მოწყობა. 

მაშინ სამუშაოებზე პასუხისმგებლობა (ჯიბლაძის ქუჩასთან ერთად) შპს "ონიქს როუდმა" აიღო, თუმცა კომპანიამ რამდენიმეთვიანი მუშაობის შემდეგ სამშენებლო პროცესი შეწყვიტა. მიზეზი, როგორც კომპანიაში განმარტეს, სამუშაოების არასწორი დაპროექტება გახდა.

იმის გამო, რომ კომპანიამ გარკვეული სამუშაოები შეასრულა, მერიამ მორიგი ტენდერი შემცირებულ თანხაზე - 199 223 ლარზე გამოცხადა, თუმცა, სახელმწიფო შესყიდვით არცერთი კომპანია არ დაინტერესდა. 

ხახანაშვილის ქუჩაზე ფილები თვეებია აყრილია, რის გამოც, როგორც მანქანებისთვის, ასევე ქვეითთათვის გადაადგილება დისკომფორტს ქმნის.

ასე გამოიყურება დღეს აღნიშნული ქუჩა:







ხსენებულ ქუჩაზე გზის საფარისა და სანიაღვრე ქსელის მოსაწყობად სახელმწიფო შესყიდვა მერიამ 2022 წლის დასაწყისში, ჯიბლაძის ქუჩის სარემონტო სამუშაოებთან ერთად, გამოაცხადა. ტენდერის გზით, კომპანია "ონიქს როუდს" 504 803 ლარის სანაცვლოდ (ჯიბლაძის ქუჩა - 285 586 ლარი, ხახანაშვილის ქუჩა - 219 216) დაევალა სარეაბილიტაციო სამუშაოების შესრულება. თუმცა, მერიის მხრიდან პროექტის (რომლის მიხედვით უნდა ჩატარდეს რემონტი) მუდმივი კორექტირების გამო განსაზღვრულ ვადაში კომპანიამ სარემონტო სამუშაოები ვერ განახორციელა.

საბოლოოდ, მხარეებს შორის დადებული ხელშეკრულება გაუქმდა. მერიამ კომპანია დააჯარიმა, ხოლო ამის საპასუხოდ "ონიქს როუდმა" სასამართლოში იჩივლა.


ამავე თემაზე:

ტენდერით არავინ დაინტერესდა - ხახანაშვილის ქუჩა ისევ მიტოვებულია

მერია, ხახანაშვილის ქუჩის სარემონტო სამუშაოებზე ტენდერს მეორედ აცხადდებს

ხახანაშვილის ქუჩაზე სარემონტო სამუშაოები მიტოვებულია

დაჯარიმებული კომპანია და მიტოვებული სამუშაოები - ჯიბლაძის და ხახანაშვილის ქუჩების "რეაბილიტაცია"

მერია დაუზიანებელი გზის რეაბილიტაციაში ნახევარ მილიონ ლარს ხარჯავს (ვიდეო)