საოკუპაციო ხელისუფლებამ უკრაინის ოკუპირებულ ტერიტორიაზე ჩატარებული ე.წ. „რეფერენდუმები“ შემდგარად გამოაცხადა და შედეგები გამოაქვეყნა.

რუსული მედიის ცნობით, ხმების 100 პროცენტის დათვლის შედეგად, რუსეთთან შეერთებას დონეცკის ოლქში ეგრეთ წოდებული „ამომრჩევლების“ 99,23-%-მა პროცენტმა დაუჭირა მხარი, ლუგანსკში ეს მონაცემი 98,42 %-ს, ზაპოროჟიეში - 93,11-ს, ხერსონში კი - 87,05 %-ს შეადგენს.

საოკუპაციო რეჟიმის მტკიცებით, „რეფერენდუმის“ დროს უხეში დარღვევები და შენიშვნები არ გამოვლენილა. უკრაინის ოთხ ოლქში - დონეცკში, ლუგანსკში, ზაპოროჟიესა და ხერსონში რუსეთთან მიერთების საკითხზე ე.წ. „რეფერენდუმები“ 23-27 სექტემბერს ჩატარდა.