ქონების მართვის სააგენტომ ქალაქის ტერიტორიაზე 23 ობიექტი შეარჩია, რომლებმაც ინვესტორები უნდა დააინტერესონ. სააგენტომ გასაყიდად გამოიტანა როგორც შენობები, ასევე, მიწის ნაკვეთები. მთავარი ობიექტი, რომლის გასხვისებაც უკვე გადაწყვეტილია, ქუთაისის მერიის შენობაა. სააგენტო შენობას 16 039 000 ლარად, იმ პირობით ყიდის, რომ მის ადგილზე სასტუმრო მოეწყობა.

საინვესტიციოდ გამზადებულ ობიექტთა ნუსხაში მოხვდა ქუთაისის "პრესის სახლი", რომელიც ასევე სასტუმროდ უნდა გადაკეთდეს. სააგენტო მიწის ნაკვეთებსა და შენობა-ნაგებობებს ყიდის ნიკეას, ცახელის, სულხან-საბას, ლესელიძის, თაბუკაშვილის, ახალგაზრდობის, ბუკიას, ავტომშენებლის, სოლომონ მეორეს, ფოთის, ანჯაფარიძის, წერეთლისა და ციხელის ქუჩებზე. საინვესტიციოდ გამზადებულია ქუთაისის ყოფილი საკონსერვო ქარხანა ასათიანის ქუჩაზე. საბოლოოდ, ქუთაისში ორი სასტუმრო, 4 დეველოპერული, 10 მულტიფუნქციური და 9 სამრეწველო-სასაწყობე ობიექტი უნდა მოეწყოს.