ქუთაისში, მოქალაქეებმა საწვავზე  და საკვებ პროდუქტებზე გაზრდილი ფასი გააპროტესტეს. 
მოქალაქეები რკინისგზის სადგურთან შეიკრიბნენ, სადაც თავიანთი მოთხოვნა გაახმოვანეს.

"უკვე 4 ლარზე მეტი ღირს და სამსახურებშიც ვეღარ დავდივართ, ხელფასი იგივე რჩება და ყველაფრის ფასი იზრდება. ჩვენი მოთხოვნაა, საწვავზე აქციზის გადასახადის გაუქმება, რომელიც 80-90% -ით გააიფებს საწვავზე ფასს.  ასევე, გამოვიდეს ვინმე ხელისუფლებიდან და აგვიხსნან რაშია საქმე?! ყველაფერი ძვირდება და პასუხისმგებლობას არ იღებს არავინ", -  განაცხადა აქციის ერთ-ერთმა მონაწილემ გიორგი ლოლაძემ. 

აქციის მონაწილეების თქმით, საწვავის გაძვირება  მიბმულია სხვა სოციალურ საკითხებთან, რომელზეც ფასები ისედაც გაძვირებულია და არ არის გამორიცხული,  რომ  ფასთა მატება ისევ გაგრძელდეს. 

"ყოველდღე კი არა დღეში სამჯერ იცვლება საწვავის ფასი და ყოველ ჯერზე იმატებს. გამოვიდეს მთავრობიდან ვინმე  და გეგმა წარმოგვიდგინონ",  - ამბობენ აქციის მონაწილეები. 

ქუთაისის გარდა, საწვავზე გაზრდილი ფასები  თბილისშიც  გააპროტესტეს. 

აქციის ორგანიზატორები მოითხოვენ, რომ შესაბამისი კომპეტენტური პირები შეხვდნენ და საინიციატივო ჯგუფი შექმნან, წინააღმდეგ შემთხვევაში კი პერმანენტულ აქციებს აანონსებენ.

საქართველოში საწვავის ფასი ისტორიულ მაქსიმუმს უახლოვდება. ქსელებში რეგულარის მარკის ბენზინი 3.71-3.77 ლარი ღირს, პრემიუმის ფასი 3.85 ლარს, სუპერის კი 3.99 ლარს აჭარბებს. 

ფინანსთა სამინისტროში ამბობენ, რომ დაზღვევის მექანიზმზე სამინისტროში მუშაობა დაწყებული აქვს, თუმცა ამ მიმართულებით ჯერ კონკრეული გადაწყვეტილება მიღებული არ არის. სამინიტროში სხვა დეტალებზე არ საუბრობენ.