უკრაინა-რუსეთს შორის მოლაპარაკების მეოთხე რაუნდზე ტექნიკური პაუზა გამოცხადდა

18:05 / 14.03.2022

უკრაინა-რუსეთს შორის 5 საათიანი მოლაპარაკებები დროებით შეწყდა.

პრეზიდენტის ადმინისტრაციის უფროსის მრჩევლისა და უკრაინის დელეგაციის წარმომადგენლის მიხაილო პოდოლიაკის განცხადებით, მოლაპარაკებებზე 15 მარტამდე პაუზა გამოცხადდა.

,,მოლაპარაკებები გაგრძელდება ხვალ, ტექნიკური შესვენებაა, სამუშაო ქვეჯგუფებში და ინდივიდუალური განმარტებების გასაკეთებლად. მოლაპარაკებები გრძელდება'',- წერს პოდოლიაკი.

უკრაინა-რუსეთს წარმომადგენლებს შორის ვიდეოკონფერენციის ფორმატში ჩატარდა.

რუსეთის მიერ უკრაინაში შეჭრის შემდეგ, მხარეებს შორის მოლაპარაკებების ორი რაუნდი შედგა, თუმცა, ორივე შეხვედრა, სადაც უკრაინის დელეგაცია ცეცხლის შეწყვეტის მოთხოვნას აყენებდა, უშედეგოდ დასრულდა. შეთანხმება არ შედგა არც უკრაინა-რუსეთის საგარეო საქმეთა მინისტრების შეხვედრაზე, რომელიც 10 მარტს თურქეთის ქალაქ ანტალიაში, თურქული მხარის შუამავლობით გაიმართა. მხარეები გარკვეულ შეთანხმებებს მხოლოდ ჰუმანიტარულ დერეფნებზე აღწევდნენ, თუმცა, რუსეთის ჯარმა არაერთხელ გაუხსნა ცეცხლი ევაკუაციის მიზნით შეკრებილ მოქალაქეებს. ჰუმანიტარული დერეფნების დროს ათობით უკრაინელი დაიღუპა, მათ შორის ბავშვები.

უკრაინაში ცხრამეტი დღეა ომია. რუსეთი სუვერენულ უკრაინას თავს 24 თებერვალს დაესხა. ვლადიმერ პუტინის მიერ ომის გამოცხადებას წინ უძღოდა რუსეთის მიერ უკრაინის ოლქების: ლუგანსკისა და დონეცკის ე.წ. დამოუკიდებელ სახელმწიფოებად აღიარება.

19 დღიანი ბრძოლის შედეგად, უკრაინული მხარის ცნობით, დაღუპულია 13 000-ზე მეტი რუსი ჯარისკაცი და განადგურებულია ხუთ მილიარდზე მეტი ღირებულების რუსეთის სამხედრო ტექნიკა. მძიმე დანაკარგების მიუხედავად, რუსული ავიაცია აგრძელებს საჰაერო თავდასხმებს უკრაინის ქალაქებზე, რასაც მშვიდობიანი მოქალაქეები ეწირებიან. სხვადასხვა ინფორმაცია ვრცელდება გარდაცვლილი სამოქალაქო პირების შესახებ. გაეროს ინფორმაციით, სამხედრო მოქმედებების შედეგად დაღუპულია უკრაინის 500-ზე მეტი მოქალაქე, ოფიციალური უკრაინის ცნობით კი გარდაცვლილა რიცხვი გაცილებით მეტია.

უკრაინისთვის ახლა მთავარ პრობლემას წარმოადგენს რუსეთის მიერ განხორციელებული საჰაერო იერიშები, რის გამოც, უკრაინის პრეზიდენტი ვოლოდიმირ ზელენსკი ევროპის ქვეყნებს საჰაერო სივრცის დაცვას სთხოვს.

ავტორი:

თიკო ჩაკვეტაძე

ავტორის სხვა სტატიები

თეგები: #პოდოლიაკი #უკრიანა

მასალის გამოყენების პირობები