ახალი ამბები
უკრაინის ელჩი ისრაელს ლტოლვილების მიღებაზე უარის გამო უჩივის
FaceBook
ისრაელში უკრაინის ელჩი ისრაელის მთავრობას და შინაგან საქმეთა მინისტრს აილეთ შაკედს უზენაეს სასამართლოში უჩივის.


საჩივრის მიზეზი უკრაინელი ლტოლვილების მიღებაზე უარის თქმა და რუსეთზე სანქციების არდაწესება გახდა. უკრაინის ელჩის ევგენ კორნიჩუკის თქმით, ისრაელმა სირაქლემას პოზიცია აირჩია.

,,ყველგან ვამბობ, ისრაელმა სირაქლემას პოზიცია აირჩია, როგორც რუსეთის წინააღმდეგ სანქციების დაწესებაზე, ასევე იარაღის მიწოდებაზე. განსაკუთრებით აღმაშფოთებელია ლტოლვილთა მიღებაზე უარის თქმა'', -
ამბობს ევგენ კორნიჩუკი.

ელჩი იმედოვნებს, რომ ისრაელის მოქალაქეები დემონსტრაციებით, ქუჩაში მსვლელობით და პოლიტიკოსებზე ზეწოლით აიძულებს მთავრობას შეცვალოს პოზიცია უკრაინასთან დაკავშირებით.

უკრაინაში ცხრამეტი დღეა ომია. რუსეთი სუვერენულ უკრაინას თავს 24 თებერვალს დაესხა. ვლადიმერ პუტინის მიერ ომის გამოცხადებას წინ უძღოდა რუსეთის მიერ უკრაინის ოლქების: ლუგანსკისა და დონეცკის ე.წ. დამოუკიდებელ სახელმწიფოებად აღიარება.

19 დღიანი ბრძოლის შედეგად, უკრაინული მხარის ცნობით, დაღუპულია 13 000-ზე მეტი რუსი ჯარისკაცი და განადგურებულია ხუთ მილიარდზე მეტი ღირებულების რუსეთის სამხედრო ტექნიკა. მძიმე დანაკარგების მიუხედავად, რუსული ავიაცია აგრძელებს საჰაერო თავდასხმებს უკრაინის ქალაქებზე, რასაც მშვიდობიანი მოქალაქეები ეწირებიან. სხვადასხვა ინფორმაცია ვრცელდება გარდაცვლილი სამოქალაქო პირების შესახებ. გაეროს ინფორმაციით, სამხედრო მოქმედებების შედეგად დაღუპულია უკრაინის 500-ზე მეტი მოქალაქე, ოფიციალური უკრაინის ცნობით კი გარდაცვლილა რიცხვი გაცილებით მეტია.

უკრაინისთვის ახლა მთავარ პრობლემას წარმოადგენს რუსეთის მიერ განხორციელებული საჰაერო იერიშები, რის გამოც, უკრაინის პრეზიდენტი ვოლოდიმირ ზელენსკი ევროპის ქვეყნებს საჰაერო სივრცის დაცვას სთხოვს.
Print