ახალი ამბები
უკრაინა-რუსეთს შორის მოლაპარაკების მეოთხე რაუნდი დაიწყო
FaceBook
უკრაინას და რუსეთს შორის მოლაპარაკებების მორიგი, მეოთხე რაუნდი დაიწყო.


უკრაინის პრეზიდენტის ადმინისტრაციის უფროსის მრჩეველმა, მიხაილო პოდოლიაკმა აღნიშნა, რომ რუსეთი მოლაპარაკებებზე ულტიმატუმების ენით აღარ საუბრობს.

"მოლაპარაკებების მეოთხე რაუნდი - მშვიდობაზე, ცეცხლის შეწყვეტაზე, სამხედრო ძალების დაუყოვნებლივ გაყვანაზე, უსაფრთხოების გარანტიებზე. რთული განხილვა იქნება. რუსეთი აცნობიერებს თავისი აგრესიული მოქმედებების სისულელეს, მაგრამ მაინც სჯერა, რომ უკრაინის მშვიდობიანი ქალაქების წინააღმდეგ 19 დღიანი ძალადობა სწორი სტრატეგიაა"
- დაწერე პოდოლიაკმა თწიტტერ-ზე მოლაპარაკებების დაწყებამდე.

შეხვედრა ვიდეოკონფერენციის ფორმატში მიმდინარეობს.

რუსეთის მიერ უკრაინაში შეჭრის შემდეგ, მხარეებს შორის მოლაპარაკებების ორი რაუნდი შედგა, თუმცა, ორივე შეხვედრა, სადაც უკრაინის დელეგაცია ცეცხლის შეწყვეტის მოთხოვნას აყენებდა, უშედეგოდ დასრულდა. შეთანხმება არ შედგა არც უკრაინა-რუსეთის საგარეო საქმეთა მინისტრების შეხვედრაზე, რომელიც 10 მარტს თურქეთის ქალაქ ანტალიაში, თურქული მხარის შუამავლობით გაიმართა. მხარეები გარკვეულ შეთანხმებებს მხოლოდ ჰუმანიტარულ დერეფნებზე აღწევდნენ, თუმცა, რუსეთის ჯარმა არაერთხელ გაუხსნა ცეცხლი ევაკუაციის მიზნით შეკრებილ მოქალაქეებს. ჰუმანიტარული დერეფნების დროს ათობით უკრაინელი დაიღუპა, მათ შორის ბავშვები.

უკრაინაში ცხრამეტი დღეა ომია. რუსეთი სუვერენულ უკრაინას თავს 24 თებერვალს დაესხა. ვლადიმერ პუტინის მიერ ომის გამოცხადებას წინ უძღოდა რუსეთის მიერ უკრაინის ოლქების: ლუგანსკისა და დონეცკის ე.წ. დამოუკიდებელ სახელმწიფოებად აღიარება.

19 დღიანი ბრძოლის შედეგად, უკრაინული მხარის ცნობით, დაღუპულია 13 000-ზე მეტი რუსი ჯარისკაცი და განადგურებულია ხუთ მილიარდზე მეტი ღირებულების რუსეთის სამხედრო ტექნიკა. მძიმე დანაკარგების მიუხედავად, რუსული ავიაცია აგრძელებს საჰაერო თავდასხმებს უკრაინის ქალაქებზე, რასაც მშვიდობიანი მოქალაქეები ეწირებიან. სხვადასხვა ინფორმაცია ვრცელდება გარდაცვლილი სამოქალაქო პირების შესახებ. გაეროს ინფორმაციით, სამხედრო მოქმედებების შედეგად დაღუპულია უკრაინის 500-ზე მეტი მოქალაქე, ოფიციალური უკრაინის ცნობით კი გარდაცვლილა რიცხვი გაცილებით მეტია.

უკრაინისთვის ახლა მთავარ პრობლემას წარმოადგენს რუსეთის მიერ განხორციელებული საჰაერო იერიშები, რის გამოც, უკრაინის პრეზიდენტი ვოლოდიმირ ზელენსკი ევროპის ქვეყნებს საჰაერო სივრცის დაცვას სთხოვს.
Print