ქუთაისის მერია უკრაინის დასახმარებლად პუმანიტარულ აქციას იწყებს.
მერიამ ამ მიზნით საგანგებო ფონდი შექმნა, სადაც ნებისმიერ მსურველს შეუძლია თანხის ჩარიცხვა. თავად ადგილობრივი თვითმმართველობის აქციაში მონაწილეობა 50 000 ლარით განისაზღვრება, რომელიც მერის 900 000 ლარიანი ფონდიდან გამოიყოფა.  

"ქუთაისის მუნიციპალიტეტი, უკრაინაში ომის დაწყების დღიდანვე აქტიურ კავშირზეა იმ უკრაინული ქალაქების თვითმმართველობებთან, რომლებთანაც ქუთაისს მრავალწლიანი მეგობრული ურთიერთობები აკავშირებს. ხარკოვის, ჟიტომირის, ლვოვის, დნიპროს, სუმის, ზაპოროჟიეს, მიკოლაევის ხელისუფლების წარმომადგენლებთან საუბრების დროს განისაზღვრა კონკრეტული საჭიროებები, როგორიცაა საველე ჰოსპიტლის აღჭურვილობა, მედიკამენტები, ბავშვის საკვები და ჰიგიენური ნივთები, ასევე სხვა ნივთები, რომელიც გამოადგებათ თავშესაფრებსა და ბრძოლის ველზე. ჰუმანიტარული აქციისთვის ქუთაისის მერიის სარეზერვო ფონდიდან თანხა გამოიყოფა",  - წერია მერიის მიერ  გავრცელებულ განცხადებაში. 

უკვე დაწყებულია პროდუქციის შეგროვებაც, რომლის მიტანაც დახმარების მსურველებს ტურიზმის ცენტრში შეუძლიათ.

უკრაინა მეექვსე დღეა იგერიებს აგრესორი რუსეთისგან თავდასხმებს. 

რუსეთმა სრულმასშტაბიანი ომი უკრაინაში 24 თებერვალს დაიწყო. რუსული ჯარები უკრაინაში შეიჭრნენ სამი მხრიდან — ჩრდილოეთიდან (ბელარუსი), აღმოსავლეთიდან (დონეცკი-ლუგანსკი) და სამხრეთიდან (ყირიმი).