ქუთაისის და ზესტაფონის თეატრში სამხატვრო ხელმძღვანელის შესარჩევი კონკურსი ჩაშლილია.
ამის შესახებ ინფორმაციას კულტურის სამინისტრო ავრცელებს. 

უწყების მიერ გავრცელებული ინფორმაციით, ქუთაისის თეატრის 6 კანდიდატიდან სამხატვრო ხელმძღვანელობის კრიტერიუმი ვერ დააკმაყოფილა, ხოლო ზესტაფონის სამი კანდიდატიდან საჭირო ხმები ვერცერთმა ვერ შეაგროვა.  

"კონკურსის ფარგლებში სამინისტროს მომართა 6-მა კანდიდატმა - თეატრის ყოფილმა სამხატვრო ხელმძღვანელმა, რეჟისორმა კონსტანტინე აბაშიძემ, ამავე თეატრის მსახიობმა - მაია სამანიშვილმა და რეჟისორებმა: გიორგი ჩალაძემ, ზაზა კიკნაველიძემ, მიხეილ ჩარკვიანმა და საბა ასლამაზიშვილმა. კულტურის სამინისტრო მიიჩნევს, რომ ყოფილი სამხატვრო ხელმძღვანელის შემთხვევაში, არადამაკმაყოფილებელია გასული ოთხწლიანი საქმიანობის ანგარიში (რაც სარეკომენდაციო საბჭოს დებულების თანახმად, ყოფილი სამხატვრო ხელმძღვანელისთვის კონკურსის ფარგლებში სავალდებულოა წარმოსადგენად).

რაც შეეხება დანარჩენ კანდიდატებს, მიუხედავად იმისა, რომ მათ შორის რამდენიმე ახალგაზრდა, პერსპექტიული რეჟისორია, წარმოდგენილი დოკუმენტაცია არ იძლევა იმის დასაბუთებულ მოლოდინს, რომ ისინი, კარიერის მოცემულ ეტაპზე, შეძლებენ ისეთი მდიდარი შემოქმედებითი ტრადიციის მქონე სახელოვნებო დაწესებულებისა და ერთ-ერთი დიდი საბიუჯეტო ორგანიზაციის მართვას, როგორიც არის ქუთაისის დრამატული თეატრი. ზესტაფონის თეატრში დასანიშნად სამინისტროს არ წარედგინოს არც ერთი კანდიდატი, ვინაიდან წარმოდგენილ კანდიდატთაგან ვერც ერთმა საბჭოს სხდომაზე ვერ დააგროვა ხმათა საჭირო რაოდენობა.

შესაბამისად, მიღებულ იქნა გადაწყვეტილება მოცემულ თეატრებში სამხატვრო ხელმძღვანელის შესარჩევი კონკურსის ჩაშლილად გამოცხადების თაობაზე", - ნათქვამია  კულტურის სამინისტროს მიერ გავრცელებულ განცხადებაში.

2022 წლის მარტის ჩათვლით, სამხატვრო ხელმძღვანელის პოსტს თეატრის დირექტორი სულხან გოგოლაშვილი ითავსებს.

ლადო მესხიშვილის სახელობის პროფესიულ სახელმწიფო დრამატულ თეატრს, მოცემულ თეატრში კონკურსი 2021 წლის 8 დეკემბერს გამოცხადდა. ხოლო ზესტაფონის თეატრში - 27 იანვარს.