ტყიბულის შახტში დაშავებული ერთი მეშახტე კვლავ რეანიმაციაში რჩება

12:06 / 04.02.2022

ტყიბულში, მინდელის სახელობის შახტში 31 იანვარს მომხდარი აფეთქების დროს დაშავებული რვა მეშახტიდან, ერთი კვლავ რეანიმაციულ განყოფილებაში იმყოფება.

მას სხეულის 60% აქვს დამწვარი. პაციენტი მკურნალობას დამწვრობის ცენტრში გადის. კლინიკის ხელმძღვანელის თქმით, დაშავებულს სასუნთქი გზების დაზიანება აღენიშნება.

"რეანიმაციის განყოფილებაში რჩება ერთი პაციენტი, მას სხეულის 60% აქვს დაზიანებული, გარდა ამისა, სასუნთქი გზების დაზიანება და ბარო ტრავმა, რაც სავარაუდოდ, აფეთქებამ გამოიწვია. დანარჩენი 7 პაციენტი თავს კარგად გრძნობს", - განაცხადა დამწვრობის ცენტრის ხელმძღვანელმა, გუგა ქაშიბაძემ.

31 იანვარს, ტყიბულის შახტში მომხდარ აფეთქებას ერთი ადამიანი ემსხვერპლა, 8 კი დაშავდა. შრომის ინსპექციის პირველადი მოკვლევით, შახტში საამფეთქებლო სამუშაოები უსაფრთხოების წესების დარღვევით მიმდინარეობდა, ამასთან, მუშაობისას ტექნიკური ხელმძღვანელი ადგილზე არ იყო.

მომხდარზე გამოძიება სისხლის სამართლის კოდექსის 240-ე მუხლით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.

ტყიბულში უბედური შემთხვევა ბოლოს გასული წლის 11 ნოემბერს მოხდა. მაშინ, ერთ-ერთ კერძო კარიერზე მიწის მასის ჩამოშლის შედეგად ორი ადამიანი გარდაიცვალა. 2010 წლიდან დღემდე, ტყიბულის ღია და დახურულ შახტებში სულ 36 ადამიანი დაიღუპა.

ამავე თემაზე:

"სამუშაოები მიმდინარეობდა უსაფრთხოების წესების დარღვევით" - შრომის ინსპექცია

ერთი გარდაცვლილი, 8 დაშავებული - აფეთქება ტყიბულის შახტში

ტყიბულის შახტში, სადაც აფეთქება მოხდა, შრომის ინსპექტორები მუშაობენ

ტყიბულში დაშავებული ერთ-ერთი მეშახტის ჯანმრთელობის მდგომარეობა მძიმეა

ავტორი:

მარიამ პატარაია

ავტორის სხვა სტატიები

თეგები: #ტყიბული #შახტი

მასალის გამოყენების პირობები