სტაციონარულ სამკურნალო დაწესებულებებსა და იზოლაციაში მყოფმა  ამომრჩევლებმა მეორე ტურში მონაწილეობის მისაღებად სპეციალური რეგისტრაცია უნდა გაიარონ.
არჩევნების მეორე ტურში მონაწილეობის მიზნით, თვითიზოლაციაში მყოფმა ამომრჩევლებმა გადასატანი საარჩევნო ყუთის მოთხოვნით, 23-დან 25 ოქტომბრის ჩათვლით, დილის 10:00 საათიდან 22:00 საათამდე უნდა მიმართონ ცესკოს ტელეფონის ნომერზე 2 51 00 51, შიდა ნომერი 0.

ცესკოს სპიკერის ნათია იოსელიანის თქმით,სპეციალური უბნები უკვე შექმნილია. 

"არჩევნებში მონაწილეობას უზრუნველყოფენ სპეციალური ჯგუფები, რომლებიც აღჭურვილები იქნებიან შესაბამისი ეკიპირებით და ამომრჩევლებს მოემსახურებიან სანიტარულ-ჰიგიენური ნორმების ზედმიწევნით დაცვითა და უსაფრთხოების სრული გარანტიით", - განაცხადა ნათია იოსელიანმა.

მისი განმარტებით,  სტაციონარულ სამკურნალო დაწესებულებებსა და იზოლაციაში მყოფი ამომრჩევლები მონაწილეობას მიიღებენ თვითმმართველი ქალაქის და თვითმმართველი თემის მერის არჩევნებში.

"გადასატანი საარჩევნო ყუთით კენჭისყრის პროცედურა დაიწყება დილის 8:00 საათზე და დასრულდება 20:00 საათზე. საარჩევნო ადმინისტრაცია მიმართავს თვითიზოლაციაში მყოფ ამომრჩევლებს ვადების გათვალისწინებით, დროულად მიმართონ საარჩევნო ადმინისტრაციას და გაიარონ სპეციალური პროცედურები"

არჩევნების მეორე ტური 30 ოქტომბერს 5 თვითმმართველ ქალაქში, 15 მუნიციპალიტეტში და 24 საარჩევნო ოლქში გაიმართება.