წინასწარი მონაცემებით, ქუთაისში პირველი ტური "ნაციონალური მოძრაობის" კანდიდატის, ხატია დეკანოიძის უპირატესობით დასრულდა, რომელმაც ხმების 43.335% მიიღო, მეორე ადგილზე გავიდა მმართველი პარტიის კანდიდატი იოსებ ხახალეიშვილი ხმების 41.45%-ით. ამ მონაცემებით, ქუთაისში მეორე ტური ჩატარდება. რაც შეეხება საკრებულოს, წარმომადგენლობითი ორგანო 35 დეპუტატით დაკომპლექტდა. აქედან 18 ეყოლება "ქართულ ოცნებას", ხოლო 17 ოპოზიციას. ამასთანავე, აღსანიშნავია, რომ შვიდი მაჟორიტარული ოლქიდან მმართველმა პარტიამ ორი ოლქი წააგო.

საარჩევნო პერიოდში კომისიაში სულ 90 საჩივარი შევიდა. აქედან მხოლოდ ექვსი დაკმაყოფილდა. ნაწილობრივ დაკმაყოფილდა 17, განუხილველი დარჩა ოთხი. 50 საჩივრის ავტორს კი მათ დაკმაყოფილებაზე უარი ეთქვა. კომისიის წევრებმა არ დააკმაყოფილეს აგიტაციის და კარუსელის შემთხვევების შესახებ დაწერილი საჩივრები, ასევე, დარღვევად არ მიიჩნიეს მარკირების გარეშე უბანზე ამომრჩევლის შესვლა, წილისყრით გამოვლენილი რეგისტრატორების თვითნებური შეცვლა, ხელმოწერილ და გაცემულ ბიულეტენებს შორის აღმოჩენილი სხვაობა, კაბინაში ერთდროულად ორი ამომრჩევლის ყოფნა და კონვერტის გარეშე ბიულეტენების ყუთში ჩაგდება.