ფოტოები სამ უბანზეა გადაღებული, სადაც ქუთაისის მერობის კანდიდატის ხატია დეკანოიძის თქმით, ჩანს ფულის დარიგების მომენტი. ოპოზიციის დამკვირვებლებმა, ასევე გადაიღეს #124-ე საარჩევნო უბნის შემაჯამებელი ოქმი, რომელიც წინასწარაა ხელმოწერილი. იმავე უბანთან დაფიქსირებულია ინფრასტრუქტურის მინისტრის მოადგილე კობა გაბუნია, რომელიც ოპოზიციის მტკიცებით, პროცესს ზედამხედველობს.


დღეს, საქართველოში მუნიციპალიტეტის ორგანოთა არჩევნები მიმდინარეობს.

ამომრჩევლები 64 მერს და ასევე, 64 საკრებულოს 2 068 წევრს (როგორც პროპორციული, ისე მაჟორიტარული წესით) ირჩევენ.

მერის არჩევნებში ის კანდიდატი გაიმარჯვებს, რომელიც არჩევნებში ამომრჩეველთა ხმების 50%-ზე მეტს მიიღებს. ამასთან, საარჩევნო რეფორმის შედეგად, 40%-იანი ბარიერი მოქმედებს საკრებულოების მაჟორიტარი წევრების ასარჩევად.