აზიის განვითარების ბანკმა (ADB) დღეს  საქართველოს 15 მილიონი აშშ დოლარის ოდენობის სესხი დაუმტკიცა.
ბანკის ინფორმაციით, აღნიშნული ფინანსური რესურსი ქვეყანას დაეხმარება დაახლოებით 700,000 დოზა კოვიდ-19-ის საწინააღმდეგო ვაქცინის, ნემსების, უსაფრთხოების ყუთების, ასევე, ვაქცინაციისთვის საჭირო სხვა ნივთების შეძენასა და ჩამოტანაში.

„ვაქცინაცია კრიტიკულად მნიშვნელოვანია კოვიდ-19-ის გავრცელებისა და მისით გამოწვეული გართულებების შესამცირებლად,“ - განაცხადა ADB-ის პრეზიდენტმა მასაცუგუ ასაკავამ.

აზიის განვითარების ბანკის ინფორმაციით,  პროექტი უზრუნველყოფს ადამიანის სიცოცხლის გადარჩენას, შეამცირებს დაავადების გავრცელებას, მისით გამოწვეულ სიკვდილიანობას და აღადგენს მოსახლეობის თავდაჯერებულობას.

,,ADB სრულ მხარდაჭერას უცხადებს საქართველოს კოვიდ-19-ის უარყოფითი გავლენის მართვაში ჯანდაცვაზე, სოციალურ დაცვასა და ეკონომიკაზე და ეს პროექტი ქვეყნის პანდემიასთან გასამკლავებლად მიმართული ADB-ის სრული მხარდაჭერის მთავარი კომპონენტია“,- აღნიშნულია ბანკის მიერ გავრცელებულ განცხადებაში.

ADB-მ საქართველოს უკვე გამოუყო $100 მილიონიანი სესხი მთავრობის ანტიკრიზისული გეგმის ფარგლებში სოციალური დაცვის მექანიზმებისა და დაზარალებული ბიზნესების მხარდაჭერის დასაფინანსებლად.

$200 მილიონიანი საბიუჯეტო სესხი ქვეყნის სოციალური დაცვის, ფისკალური და ვალის მართვის სისტემების გასაძლიერებლად გამოიყო და $2.5 მილიონიანი გრანტი გაიცა ლაბორატიული სატესტო შესაძლებლობების გაუმჯობესებისა და სამედიცინო აღჭურვილობის შესაძენად.

24 სექტემბრის მონაცემებით სულ ჩატარებულია 1 715 073 აცრა.

1 დოზით ვაქცინირებულია 963 663 ადამიანი - მოზრდილი მოსახლეობის 33.9%.

სრულად ვაქცინირებულია 751 410 ადამიანი - მოზრდილი მოსახლეობის 26.3%

23 სექტემბერს აიცრა 12 778 ადამიანი.