ქუთაისის "ტორპედო" არ გაიყიდა

19:28 / 19.08.2021

"ტორპედოს" გასაყიდად გამოცხადებული აუქციონი ჩაიშალა.

კლუბის შეძენით არავინ დაინტერესდა. მერია ქუთაისურ კლუბს 567 017 ლარად ყიდდა.

ადგილობრივი თვითმმართველობა პოტენციურ ინვესტორს 15 მოთხოვნას უყენებდა. მთავარი პირობა კლუბის დავალიანების გასტუმრება იყო, რომელიც მერიის ინფორმაციით, 2 470 000 ლარია. ახალ მფლობელს თანხა წლის ბოლომდე უნდა გადაეხადა. ასევე, კლუბის განვითარებისთვის ყოველწლიურად მინიმუმ ერთი მილიონი ლარის ინვესტიცია უნდა განეხორციელებინა. ინვესტორს თავად უნდა მოეძებნა დონორები და შემოსავლის ალტერნატიული წყაროები.

"ფეხბურთის განვითარების ფონდის" დაფინანსების შემთხვევაში ეს თანხა ყოველწლიურად იქნებოდა 2 500 000 ლარი, ხოლო, ფონდის ფუნქციონირების შეწყვეტის შემთხვევაში, 4 მილიონი ლარი. მოზიდული თანხის 10% უნდა მოხმარებოდა კლუბის მატერიალურ-ტექნიკური ბაზის გაუმჯობესებას.

ახალ მფლობელს ყოველწლიურად უნდა მოეპოვებინა უეფასა და ეროვნული ლიცენზიები. წელიწადში 100-დან 200 ბავშვამდე კონტიგენტისთვის უნდა უზრუნველეყო საფეხბურთო სკოლა-აკადემიისა და ბავშვთა გუნდების ფუნქციონირება.

ქუთაისის მერია კლუბის პოტენციური მფლობელისგან, ასევე, არაღიარებული ფინანსური ვალდებულებების შესრულებას ითხოვდა.

ქუთაისის მერიამ "ტორპედო" აუქციონზე პირველად 2017 წელს გაიტანა. მაშინ კლუბი 300 000 ლარად გაიყიდა, თუმცა, ზაალ ჩაჩავამ ვალდებულებები ვერ შეასრულა და კლუბი დატოვა. ამის შემდეგ "ტორპედოთი" იტალიელ ინვესტორთა ჯგუფი დაინტერესდა, რომლებმაც ასევე, არ შეასრულეს ქუთაისის მერიის წინაშე აღებული ფინანსური ვალდებულებები.

ავტორი:

მარიამ პატარაია

ავტორის სხვა სტატიები

თეგები: #ტორპედო

მასალის გამოყენების პირობები