ბაღდათის მუნიციპალიტეტში, სოფელ ვარციხეში უკანონო თევზჭერის ორი ფაქტი გამოვლინდა.
ამის შესახებ ინფორმაციას გარემოს დაცვის ზედამხედველობის სამსახური ავრცელებს.

დეპარტამენტის ინფორმაციით, ბაღდათის მუნიციპალიტეტის სოფელ ვარციხეში, მდინარე რიონზე, კაშხალთან 500-მეტრიან აკრძალულ ზონაში ერთი მოქალაქე ანკესის, მეორე კი 150-მეტრიანი სახლართი ბადისა და გასაბერი ნავის გამოყენებით თევზს იჭერდა. 

ერთ-ერთ სამართალდამრღვევს მოპოვებული ჰქონდა ექვსი კილოგრამი შერეული სახეობის თევზი.

"დეპარტამენტის თანამშრომლებმა სამართალდამრღვევებს უკანონოდ მოპოვებული თევზი, თევზჭერის საშუალებები და ნავი ჩამოართვეს. მასალები, შემდგომი რეაგირების მიზნით, შესაბამის უწყებებში გადაიგზავნება'',- ნათქვამია გარემოს დაცვის ზედმახედველობის სამსახურის მიერ გავრცელებულ ინფორმაციაში.

გარემოსდაცვითი ზედამხედველობის დეპარტამენტის თანამშრომლებმა, 2021 წლის 01 იანვრიდან 30 აპრილის ჩათვლით, უკანონო თევზჭერის 123 ფაქტი გამოავლინეს, მათ შორის 4 ფაქტი სისხლის სამართლის დანაშაულის ნიშნებს შეიცავს.