სხალთელმა ეპისკოპოსმა სპირიდონმა, თავის ქადაგებაში რიონის ხეობის ერთ-ერთ მცველზე მაკა სულაძეზე ისაუბრა.
ეპისკოპოსი მაკა სულაძის განცხადებას გამოეხმაურა, რომელშიც აქტივისტმა თქვა, რომ თბილისში მსვლელობაში ჯვრით მონაწილეობას არ მიიღებდა, ამის მიზეზად კი სხვა რელიგიის წარმომადგენლებისთვის უხერხული სიტუაციის არშექმნა დაასახელა.

მთავარეპისკოპოსი სპირიდონის შეფასებით მძიმე ცოდვა იქნა ჩადენილი.

"არ ვიცი, რით მოხდა ეს უმეცრებით, გაუნათლებლობით თუ ურწმუნობით, ძალიან მძიმე ცოდვა იქნა ჩადენილი, რომ ჯვრის ძალა იქნა დაგმობილი და ასეთი რამე იქნა ნათქვამი, რომ სხვებს არ ეწყინოთო, მე ამ სიმბოლოს ჯვარს აღარ ვატარებო. ჯვარი სიმბოლო არ არის, ჯვარი ღვთის ძალაა, გამარჯვების და ძლევის იარაღი და როცა შენ შენი ნებით ამბობ უარს ჯვარზე და იძახი, ვიღაცას არ ეწყინოს და აღარ ვატარებო, შენი ნებით ამბობ უარს გამარჯვებაზე, ძლევაზე უარს და ჯვრის მგმობელების რიგში დგები", - განაცხადა მთავარეპისკოპოსმა სპირიდონმა.

მთავარეპისკოპოსის თქმით, როგორც საჯაროდ იქნა დაგმობილი ჯვარი, საჯაროდ უნდა იქნას გამონათქვამი "შენანებული".

რიონის ხეობის მცველს, მაკა სულაძეს თბილისში 26 მაისს გამართულ აქციაზე ჯვრით მონაწილეობა არ მიუღია. მაკა სულაძე ვაზის ჯვარს ხელით მთელი პროტესტის განმავლობაში ატარებდა.

"მე დღეს იმ ჯვრით აღარ ვმონაწილეობ მსვლელობაში, რომელიც აქამდე გულით მიტარებია და ჩემთვის ძალიან ძვირფასია. ყოველთვის ასე დარჩება. ის არა მარტო ჩემი რწმენის სიმბოლოა, არამედ ჩემი მიწის, ჩემი ცის და სულკურთხეული დედის სიმბოლოა. მაგრამ თუკი მე გვერდით მიდგას სხვა რელიგიის წარმომადგენელი და მან ეს არ იცის, შეიძლება ამით უხერხულობა შევუქმნა. ამიტომ გადავწყვიტე. თბილისი მრავალეროვანი ქალაქია. დარწმუნებული ვარ აქ სხვა რელიგიის წარმომადგენლებიც ბრძანდებიან, მათთვის ისეთივე ძვირფასია ქართული მიწა, როგორც ჩვენთვის. მე ჩემი ჯვრის ტარებით არ შევუქმნი მათ უხერხულობას", - განაცხადა 26 მაისს თბილისში გამართულ აქციაზე მაკა სულაძემ.

ნამახვანჰესის მოწინააღმდგეები საპროტესტო აქციას თბილისში 23 მაისიდან ოთხი დღის განმავლობაში მართავდნენ.