ახალი ამბები
კულტურული მემკვიდრეობის დაცვის სააგენტო ენმ-ს პასუხობს
13:58 / 22.01.2021
საქართველოს კულტურული
მემკვიდრეობის დაცვის ეროვნული სააგენტო "ერთიანი ნაციონალური
მოძრაობის" ქუთაისის ორგანიზაციის წევრების განცხადებას
პასუხობს.
"ზოგადად, ყველა პოლიტიკურ პარტიას აქვს გამოხატვის უფლება.
თუმცა, გადაყენების მოთხოვნა დარგობრივი სამინისტროს ხელმძღვანელის
გადასაწყვეტია და ეს გახლავთ მათი შესაფასებელი. კულტურული
მემკვიდრეობის დაცვის სააგენტოსთვის პასუხისმგებლობის დაკისრება
მართებული არ არის. ტენდერში გამარჯვებული კომპანია არის
პასუხისმგებელი, რადგან ტენდერით მიღებული თანხის განკარგავაზე სრულად
კომპანია იყო პასუხისმგებელი. ამ მიმართულებით სააგენტო არაფერ შუაში
არ არის", - ამბობს საქართველოს კულტურული მემკვიდრეობის
დაცვის ეროვნული სააგენტოს საზოგადოებასთან ურთიერთობის სამსახურის
უფრო ბექა ბარამიძე.
დღეს, პარტია "ერთიანი ნაციონალურ მოძრაობის" ქუთაისის ორგანიზაციის
წევრები კულტურული მემკვიდრეობის დაცვის სააგენტოსა და მუნიციპალური
განვითარების ფონდის ხელმძღვანელების გადადგომა მოითხოვეს.
გელათის მონასტერში, ღვთისმშობლის სახელობის ტაძარზე დროებით
გადახურვა სამი დღის წინ დაზიანდა. ისტორიულ ნაგებობაზე დროებითი
სამუშაოების ჩატარება მას შემდეგ გახდა საჭირო, რაც გასული წლის
ზაფხულში, სახურავის რეკონსტრუქციიდან ერთ თვეში, ტაძარში წყალი
ჩავიდა და ფრესკები დააზიანა. უნიკალური მხატვრობის დაზიანების
პროცესი ამ დრომდე გრძელდება, კედლის წვრილი ფრაგმენტები ტაძრის
მსახურებს იატაკსა და ხალიჩებზე ამ დრომდე ხვდებათ.
მას შემდეგ, რაც ტაძარზე ხარვეზებმა თავი იჩინა და შუა საუკუნეების
ნაგებობის უნიკალური ფრესკები განადგურების რეალური საფრთხის წინაშე
აღმოჩნდა, პრობლემა აღიარა კულტურული მემკვიდრეობის სააგენტომაც,
თუმცა, პასუხისმგებლობა მოიხსნა და მომხდარი სამუშაოების შემსრულებელ
კომპანიას "ხელოვნების საერთაშორისო ცენტრს" დააბრალა. სააგენტოს
თქმით, კომპანიამ სახურავი ცუდი ხარისხის კრამიტით მოაპირკეთა. ამის
შემდეგ გელათი ისევ ხარაჩოებში მოექცა და ღვთისმშობლის სახელობის
ტაძარი ტენტით გადახურეს. ტაძარს დროებითმა გადახურვამ არ უშველა.
ნაგებობაში კვლავ ჩადიოდა წყალი. საზოგადოების მწვავე პროტესტის
შემდეგ, სააგენტო იძულებული გახდა სახურავზე ამჯერად თუნუქის
გადახურვა მოეწყო, თუმცა, არც ეს დროებითი ღონისძიება აღმოჩნდა მყარი.
ორი დღის წინ თუნუქიც დაზიანდა და ტაძარზე სპეციალისტები ისევ
ხარვეზების გამოსასწორებლად ავიდნენ.
მომხდარის შემდეგ სააგენტო იძულებული გახდა სამუშაოების მწარმოებელი
კომპანიები დაეჯარიმებინა და პროცესისთვის ჩამოეშორებინა.
ტაძარზე ახლა სრულად უნდა შეიცვალოს კრამიტი, რომელსაც ახალი კომპანია
შეასრულებს.
გელათის სამონასტრო კომპლექსში სარეაბილიტაციო სამუშაოები 2013 წელს
დაიწყო და რამდენიმე ეტაპად განხორციელდა. პროექტი ამერიკის საელჩომ
და მსოფლიო ბანკმა ორ მილიონ ლარზე მეტით დააფინანსა. მონასტერი
მსოფლიო მემკვიდრეობის ნუსხაში 1994 წელს ბაგრატის ტაძართან ერთად
შეიტანეს, თუმცა, ბაგრატის ტაძარზე განხორციელებული სამუშაოების
შემდეგ, იგი ნუსხიდან ამოიღეს და საფრთხის შემცველ ძეგლთა სიაში
გადაიტანეს. 2017 წელს, ხანგრძლივი ბრძოლის შემდეგ, გელათის მონასტერი
ისევ დააბრუნეს მსოფლიო მემკვიდრეობის ძეგლთა სიაში.
ამავე თემაზე:
ენმ კულტურული მემკვიდრეობის ხელმძღვანელების გადადგომას
ითხოვს
მასალის გამოყენების პირობები