საზოგადოებრივი მოძრაობა „რიონის ხეობის გადარჩენისთვის“ და სახალხო გაერთიანება „თემთა ერთობა" ნამოხვანის ჰესების კასკადის მშენებლობის წინააღმდეგ ხელისუფლებას მოთხოვნებს უყენებენ.

ორი კვირის ვადაში შეწყდეს ნამოხვანის ჰესების კასკადის ე. წ. მოსამზადებელი სამუშაოები და გაყვანილ იქნას ტექნიკა.

ჩატარდეს გამოძიება შუახევი ჰესის ნგრევასთან დაკავშირებით და განისაზღვროს კომპანია „ქლინ ენერჯის“ საქართველოში საქმიანობით გამოწვეული ზარალის მასშტაბი. გამოვლინდნენ და პასუხისმგებლობა დაეკისროთ ამ საქმესთან დაკავშირებულ პირებს.

გაუქმდეს 2015 წელს ხელმოწერილი ნამახვანის ჰესების კასკადის სამშენებლო ნებართვა და ყველა სხვა მასზე დაფუძნებული დოკუმენტი. ჩატარდეს გამოძიება და განისაზღვროს იმ პირთა პასუხისმგებლობის საკითხი, რომლებიც უკავშირდებიან ამ დოკუმენტებს.

თანამდებობიდან გადადგეს ეკონომიკისა და მდგრადი განვითარების მინისტრი ნათია თურნავა და გარემოს დაცვისა და სოფლის მეურნეობის მინისტრი ლევან დავითაშვილი.

მიმდინარე წლის 5 ივლისს წყალტუბოს მუნიციპალიტეტის სოფელ ნამოხვანში „რიონის ხეობის გადარჩენისთვის“ და „თემთა ერთობის“ ინიციატივით გაიმართა საპროტესტო აქცია ნამოხვანის ჰესების კასკადის წინააღმდეგ.

აქტივისტები, საქართველოს პრეზიდენტ სალომე ზურაბიშვილს  წერილობით მიმართავენ, რომელიც  ფართომასშტაბიანი აქციის დღეს 5 ივლისს მეზობელ ცაგერის მუნიციპალიტეტს სტუმრობდა:


მ ი მ ა რ თ ვ ა

ქ-ნო სალომე,

მოხარულნი ვართ, რომ სტუმრად ბრძანდებით ცაგერის მულიციპალიტეტში და იმედი გვაქვს, ჩვენთვის სათაყვანებელი ლეჩხუმი თქვენს გულში სამუდამო ბინას დაიდებს. სტუმარი ღვთისაა, კეთილი იყოს თქვენი მობრძანება!
მოგახსენებთ, რომ გავრცელდა შიდა ინფორმაცია, რომ დაგეგმილია თქვენი მონაწილეობა ნამოხვანის ჰესების კასკადის მშენებლობის გახსნის ცერემონიალში. ამასთან დაკავშირებით რაიმე სახის ოფიციალური ინფორმაცია ჩვენ ვერ მოვიპოვეთ. არც ის შეგვიძლია რომ არაოფიციალური გზით შევამოწმოთ ამ ამბის ნამდვილობა. ამიტომ პირდაპირ, მიკიბვ-მოკიბვის გარეშე, მოგმართავთ:

ვიდრე რაიმე სახის ღონისძიებაში მონაწილეობას გადაწყვეტთ, თქვენ, როგორც კონსტიტუციის გარანტი, დოკუმენტალურად გაერკვიეთ სახელმწიფოს მხრივ ნამოხვანის ჰესების კასკადის პროექტთან დაკავშირებული ქმედებების კანონიერებაში, არ დაეყრდნოთ მაღალჩინოსანთა მხოლოდ სიტყვიერ განცხადებებს,რომლებიც ცდილობენ გამოიყენონ თქვენი ავტორიტეტი და სახელი. გამოცდილებით ვიცით, რომ მათთვის ეს არის პასუხისმგებლობის თავიდან არიდების ნაცადი ხერხი. ხალხისთვის მათი სახელები უცნობი რჩება, სამაგიეროდ, ამახსოვრდებათ ისინი, ვისი ხელითაც საზეიმოდ იჭრება ავბედითი ლენტი. თითოეულ ჩვენგანს აკისრია თავისი წილი პასუხისმგებლობა ღვთისა და ერის წინაშე - ზოგს მეტი და ზოგს ნაკლები, ხოლო თქვენი პასუხისმგებლობის ტვირთი გაცილებით მეტია სხვებისაზე და შესაძლოა, იმაზე მეტიც, ვიდრე ჩვენ წარმოგვიდგენია.

გფარავდეთ და შეგეწიოთ ხვამლის წმიდა გიორგი თქვენ და სრულიად საქართველოს!


რიონის ხეობაში 433 მეგავატი სიმძლავრის ჰესს კომპანია "ქლინ ენერჯი გრუპი" აშენებს. ნამახვანი ჰესის მშენებლობის ნებართვა კომპანიამ 2015 წელს "საქართველოს ენერგეტიკის განვითარების ფონდის" მიერ გამოცხადებულ ტენდერში გამარჯვების შედეგად მოიპოვა.

პროექტის მიხედვით, წყალტუბოსა და ცაგერის მუნიციპალიეტეტში, მდინარე რიონზე მშენებარე ნამახვანისა და ტვიშის ჰესები წლიურად 1,514 გეგა ვატ.სთ ენერგიას გამოიმუშავებენ, ხოლო ჰესებზე დადგმული სიმძლავრე ჯამურად 433 მეგა ვატს შეადგენს.

პროექტი 750 მილიონი დოლარის ღირებულებისაა. ინვესტიციის სანაცვლოდ, კომპანია ჰესის ამოქმედების შემდეგ, ბიუჯეტში წლიურად 20 მილიონ ლარის შეტანის პირობას დებს. კომპანიის ინფორმაციით, მშენებლობაზე, რომელიც სამ წელზე მეტ ხანს გაგრძელდება, 3000-მდე ადამიანი დასაქმდება.

"თემთა ერთობის" წევრები ამბობენ, რომ კომპანიას არ აქვს გარემოზე ზემოქმედების შეფასების (გზშ) განახლებული გეგმა. გაერთიანების წევრების თქმით, კომპანია ვერ პასუხობს მათ კითხვებს დაგეგმილი მშენებლობის საფრთხეებთან დაკავშირებით.


ფოტო: ბუნება ჰესების გარეშე