ცხრა საათის შემდეგ  გარეთ გასვლა, ავტომობილით მოძრაობის წესების დარღვევა, ავტომანქანით სამზე მეტი ადამიანის გადაყვანა,  მძღოლის გვერდით ჯდომა  და ეკონომიკური საქმიანობის წესის დარღვევა - ეს  ის ძირითადი დარღვევებია, რის გამოც,  საგანგებო მდგომარეობის პერიოდში  ფიზიკური პირები დაჯარიმდნენ.

ედიშერ აბდუშელიძე ერთ-ერთია იმ 15 ადამიანს შორის, რომელმაც "საიას" საჩივრით მიმართა.  აბდუშელიძე პოლიციის თანამშრომლებმა პირველ აპრილს, კომენდანტის საათის დროს ავტომობილით გადაადგილების გამო,  3000 ლარით დააჯარიმეს.

დაჯარიმებული მოქალაქის სარჩელი, რომელიც "საიას" ქუთაისის ფილიალის  იურისტმა მოამზადა, საპატრულო პოლიციის  იმერეთის სამმართველოში უკვე გაიგზავნა. საჩივარში ედიშერ აბდუშელიძე მისი მატერიალური მდგომარეობისა და  შექმნილი ვითარების გათვალისწინებას ითხოვს.

"საქართველოს ადმინისტრაციული  სამართალდარღვევათა კოდექსის #264-ე  მუხლის  მიხედვით, დამჯარიმებელი უწყება, ასეთი საქმეების განხილვისას,  მოვალეა დაადგინოს,  ბრალეულია თუ არა დაჯარიმებული მის ჩადენაში, არის თუ არა პასუხისმგებლობის შემამსუბუქებელი და დამამძიმებელი გარემოებები", - განმარტავს ადვოკატი სალომე სალდაძე. საჩივრის არდაკმაყოფილების შემთხვევაში,  "საია" ჯარიმას  ქუთაისის საქალაქო სასამართლოში გაასაჩივრებს.