შსს ინფორმაციით, "თავისუფალი ზონის"  წევრები 238-ე მუხლის მეორე და მესამე ნაწილის თანახმად არიან დაკავებულნი.

ქუთაისში, ნიკეას ქუჩაზე ერთი საათის წინ "თავისუფალი ზონის" წარმომადგენლები დააკავეს. ნიკა ნარსია და მირიან დეისაძე თვითმხილველების თქმით, ქუჩიდან აიყვანეს.  ოდნავ მოგვიანებით, კი მესამე პირის კახაბერ გაბუნის დაკავებაც მოხდა, საკუთარ სახლში.

"ნაციონალური მოძრაობის" ქუთაისის ორგანიზაციის წარმომადგენლის, კოტე რატიანის განმარტებით, ამ დროისთვის მათთვის უცნობია, თუ სად ჰყავთ დაკავებულები.

"არ გვეუნებიან სად ჰყავთ. გვაქვს ინფორმაცია რომ "თავისუფალი ზონის" სხვა წარმომადგენლების დაკავებაც იგეგმება", - განმარტავენ "ნაციონალურ მოძრაობაში".
"ნაციონალური მოძრაობის" ქუთაისის ორგანიზაციის წარმომადგენლების განმარტებით, ნარსიასა და დეისაძის დაკავება გუშინ პარლამენტთან ტელეკომპანია რუსთავი 2-ის მხარდასაჭერად გამართულ აქციას უკავშირდება, სადაც ინცინდენტიც მოხდა.

"უმრავლესობის წევრის დავით ლორთქიფანიძის მხრიდან ადგილი ჰქონდა აქციის მონაწილეების მიმართ გამოთქმულ სიტყვიერ შეურაცხყოფას, რასაც ფიზიკური დაპირისპირება მოყვა. იქ არავის არავისთვის ძვირადღირებული პიჯაკი არ შემოუხევია. თუმცა, "თავისუფალი ზონის" წევრების დაკავება ამის გამო მოხდა", - განმარტავენ "ნაციონალური მოძრაობის" წარმომადგენლები.

საქართველოს შინაგან საქმეთა სამინისტროს პრესსამსახურის ინფორმაციით, "თავისუფალი ზონის" ორი წევრი 239-ე მუხლის მეორე და მესამე ნაწილის თანახმად არიან დაკავებულნი, რომელიც ფიზიკურ შეურაცხყოფას ითვალისწინებს. პრესსამსახურისვე ცნობით, დაკავებულები წინასწარი დაკავების იზოლატორში არიან მოთავსებულნი.