ტყიბულში, ძიძიგურის შახტში დასაქმებულები მმართველი კომპანიის  გადაწყვეტილებას, მათი  სხვა შახტში გადაყვანის შესახებ,  დათანხმდნენ.

„ზეპირად შევთანხმდით დროზე, მაგრამ ბრძანებაში, რომელიც კომპანიამ გამოსცა, წერია, რომ ტექნიკური სამუშაოების დასრულების შემდეგ განისაზღვრება კონკრეტული თარიღი, როდის აღდგება სამუშაო პროცესი შახტში. გარდა ამისა, პროფკავშირებმა შევიტანეთ  წერილი, რომ თუ სამთვიანი პირობა არ შესრულდება, ისევ გავაგრძელებთ საპროტესტო აქციებს“, - ამბობს „ტყიბულის მეშახტეთა პროფკავშირის“ თავმჯდომარე, გიგა ისაკაძე.

მისი თქმით, კომპანია თანხმაა, რომ თანამშრომლები ახალ სამუშაო ობიექტზე ძიძიგურის შახტიდნ ჩავიდნენ და ძველებურად ისარგებლონ ამავე შახტის ადმინისტრაციული შენობით. მეშახტეები მომავალ კვირას ადგილზე მთავრობის წარმომადგენლების ჩასვლასაც ელოდებიან, თუმცა, დაზუსტებით არ იციან ვინ შეიძლება ჩავიდეს ტყიბულში.

ძიძიგურის შახტში დასაქმებულები 24 თებერვალს გაიფიცნენ. ისინი ახალი ინვესტორის გადაწყვეტილებას,  ობიექტზე ტექნიკური რემონტის მიზეზით მუშების მინდელის შახტში გადაყვანის შესახებ, არ ეთანხმებოდნენ.  გაფიცულები ამბობდნენ, რომ კომპანიას სინამდვილეში ძიძიგურის შახტის დახურვა ჰქონდა გადაწყვეტილი. მეშახტეები ამბობდნენ, რომ პროტესტს იმ შემთხვევაში შეწყვეტდნენ, თუ რემონტის განმავლობაში გაცდენილი სამუშაო საათები აუნაზღაურდებოდათ.

კომპანიამ გაფიცულების საპასუხოდ თავიდანვე სამთვიანი ვადა მოითხოვა,  ობიექტზე სამუშაო პროცესის შეჩერების პარალელურად კი მათთვის ხელფასის გადახდაზე კატეგორიული უარი განაცხადა.

ამავე თემაზე:

ტყიბულის შახტების მმართველი კომპანია გაფიცულების მოთხოვნების დაკმაყოფილებას არ აპირებს
„პროტესტი მასშტაბურ ხასიათს მიიღებს“ - ტყიბულელი მეშახტეების გაფიცვა გრძელდება
ტყიბულში მეშახტეები გაიფიცნენ
ტყიბულის შახტის მფლობელის პირველი კომენტარი გაფიცვაზე