წყალტუბოში, სანატორიუმ "მეგობრობაში" გაჩენილი ხანძრის შედეგად გარდაცვლილი ორი ქალბატონის ცხედარი, იმავე შენობაში, სხვა ოთახში გადაასვენეს.

ხანძრის გამომწვევი ზუსტი მიზეზი ჯერჯერობით უცნობია, თუმცა, მეზობლების ვარაუდით, 70 წლმადე ასაკის ქალბატონებს ღამით სანთელი დარჩათ ანთებული. მათი თქმით, მოხუცებს, რომლებიც ძირითადად ერთად ცხოვრობდნენ, ერთ კვირაზე მეტია ელექტროენერგია გათიშული ჰქონდათ.

"ღამის სამი საათი იქნებოდა, სახანძროს ხმამ გაგვაღვიძა. გარეთ რომ გამოვედით, ორივე დამწვარი იყო უკვე. თავიანთი ოთახები ჰქონდათ, მაგრამ აფხაზეთიდან მოყოლებული მეზობლები იყვნენ და აქაც ერთად ცხოვრობდნენ. ახალ წლამდე რამდენიმე დღით ადრე გაუთიშეს დენი. 31-შიც არ ჰქონდათ. სანთელს ანთებდნენ საღამოობით და ალბათ დარჩათ", -ამბობს სანატორიუმის ერთ-ერთი მცხოვრები.

როგორც "ენერგო პრო ჯორჯიაში" ქუთაისიპოსტს განუცხადეს, მოხუცებს ელექტროენერგია დავალიანების გამო ჰქონათ გათიშული. გარდაცვლილთაგან ერთ-ერთს ოჯახის წევრები არ ჰყავდა, მეორეს კი ორი შვილიშვილი დარჩა.








წყალტუბოს მერიაში აცხადებენ, რომ გარდაცვლილების დაკრძალვის ხარჯებს ადგილობროვი მუნიციპალიტეტი დაფარავს.

ადგილზე იმყოფებოდა დევნილთა სამინისტროს წარმომადგენელი, გიორგი ქორიძე, რომლის გამოჩენასაც სიტყვიერი დაპირისპირება მოჰყვა. სანატორიუმის მცხოვრებმა ჯონი ახვლედიანმა სამინისტროს წარმომადგენელი უყურადღებობაში დაადანაშაულა და განაცხადა, რომ შენობა, სადაც 20-ზე მეტი ოჯახი ცხოვრობს, წლებია ამორტიზებულია, მაგრამ უწყება პრობლემაზე არ რეაგირებს.

გიორგი ქორიძეს არ დაუკონკრეტებია როდის დააკმაყოფილებს დევნილთა სამინისტრო სანატორიუმ "მეგობრობაში" მცხოვრებლებს საცხოვრებელი ფართით, თუმცა, განაცხადა რომ წყალტუბოსა და ქუთაისში დევნილებისთვის კორპუსები შენდება, სადაც ბინას 2000-მდე ოჯახი მიიღებს. რაც შეეხება ხანძრის შედეგად ერთ-ერთი გარდაცვლილის ოჯახს, გიორგი ქორიძის თქმით, სამინისტრო შეისწავლის მათი საცხოვრებლით უზრუნველყოფის საკითხს და ამის შემდეგ გადაწყვეტს, გადასცემს თუ არა ალტერნატიულ ფართს.

ყოფილი სანატორიუმის შენობაში 25-დე  დევნილი ოჯახი ცხოვრობს.