ქუთაისის მაჟორიტარი დეპუტატი, დიმიტრი მხეიძე, საკრებულოს სხდომაზე მისვლასთან დაკავშირებით განმარტვას, რომ თავისუფლი დრო ჰქონდა და სხდომაზე  ამიტომ  მივიდა.

გარდა ამისა, აინტერესებდა საკრებულოს მუშაობა.

„პარლამენტში შესვენება გვაქვს და რა მინდა თბილისში, როცა  ჩემი ქალაქი ქუთაისია?  რამდენიმე ადამიანთან შეხვედრა მაქვს ბიუროში და პარალელურად, ვიდრე ხალხი შეიკრიბებოდა ბიუროში,  ჩამოვედი, ვნახე როგორ მიმდინარეობდა სხდომა. მე შევაფასებდი კარგად სხდომის  მიმდინარეობას, მაგრამ ბრწყინვალედ ვერა, რადგან ოპოზიცია არ ესწრებოდა. მათ გარეშე კი სხდომა სრულყოფილი არ არის“,-განაცხადა დიმიტრი მხეიძემ.

დეპუტატი ამბობს, რომ არ იცნობს იმ ადამიანებს, რომლებიც ჯერ მერიის წინ გამართულ საპროტესტო აქციების დროს მომხდარ ინციდენტებში მონაწილეობდნენ, შემდეგ კი  მის ბიუროსთან დაბოქლომების აქციისთვის ხელის შეშლას ცდილობდნენ. დღევანდელ სხდომაზე კი  საკრებულოს სხდომათა დარბაზში იყვნენ მობილიზებული.

„ინციდენტებზე მაქვს ინფორმაცია რა თქმა უნდა, მაგრამ მე ნამდვილად არ ვიცი ვინ მონაწილეობდა ამ ინციდენტებში.  არ ვიცი არც ის,  იგივე ხალხი იყო თუა არა ბიუროსთან  და ახლა ისევ ისინი არიან თუ არა აქ. ამაზე ვერ გიპასუხებთ. რაც შეეხება დაბოქლომებას, თუ ოპოზიციისთვის ეს არის სიმბოლიკა, ჩემთვისაც სიმბოლიკაა, რომ არ დავაბოქლომებიოთ ის ბიურო, რომელიც 2016 წლიდან ღიაა და უამრავ ადამიანს დაეხმარა“, - განაცახდა დიმიტრი მხეიძემ.

ქუთაისის სამი მაჟორიტარიდან, არც ერთი,  საკრებულოს რიგით სხდომებს, განსაკუთრებული შემთხვევის გარდა  არ ესწრება. დეპუტატები საკრებულოში,   ბოლოს,  2017 წელს, ტექნოლოგიური უნივერსიტეტის განაშენიანების გეგმის დამტკიცებაზე იმყოფებოდნენ.