ქუთაისის მერიის შენობაში, მაჟორიტარის ბიუროს დაბოქლომებას, სამართალდამცავებთან ერთად, მერიის თანამშრომლები და საკრებულოს დეპუტატები სამი საათის განმავლობაში ელოდნენ.

სავარაუდოდ, სწორედ ამ დროს მიიღეს მერიაში შეტყობინება დაბოქლომების აქციის შესაძლო მოწყობის შესახებ. რამდენიმე დეპუტატმა და მათ შორის მათ, ვინც ბოლო დღეებში მერიის შენობის წინ მოწყობილ აქციებს თვალყურს ადევნებდა, სხდომა მის დასრულებამდე რამდენიმე წუთით ადრე დატოვა. ამ დროს დიმიტრი მხეიძის ბიუროსთან უკვე იკრიბებოდნენ სამართალდამცავები. მალვე, მათ მერიის აიპების ის თანამშრომლებიც შეუერთდნენ, რომლებიც აქციების დროს მომხდარ ინციდენტებში აქტიურად მონაწილეობდნენ.

არც სამართალდამცავები და არც ადგილობრივი თვითმმართველობის წარმომადგენლები არ პასუხობდნენ შეკითხვას, თუ რას უკავშირდებოდა მათი მობილიზაცია ბიუროსთან. თავად მაჟორიტარი დეპუტატი დიმიტრი მხეიძე ბიუროში არ იმყოფებოდა.

სამსაათიანი ლოდინის შემდეგ,  როცა ოპოზიციური პარტიების ადგილობრივი ორგანიზაციების წარმომადგენლები და სამოქალაქო აქტივისტები თბილისში, აქციაზე გაემგზავრნენ, მაჟორიტარის ბიურო სამართალდამცავებთან ერთად თვითმმართველობის წარმომადგენლებმაც დატოვეს.


შინაგან საქმეთა სამინისტროში ამ დრომდე არ განუმარტავთ რის საფუძველზე მოხდა საპოლიციო ძალების მობილიზება მერიის ადმინისტრაციულ შენობაში.

დიმიტრი მხეიძის ბიუროს დაბოქლომება ოპოზიციამ  22 ნოემბერს სცადა,  თუმცა, პოლიციამ მათ ამის შესაძლებლობა არ მისცა.