ახალი ამბები
"სააგენტომ ულუკმაპუროდ დაგვტოვა" - ქუთაისში სოციალურად დაუცველებს დახმარება შეუჩერდა
FaceBook
სოციალურ საცხოვრისში მცხოვრები ნემსწვერიძეების 8 სულიანი ოჯახის ერთადერთი შემოსავალი ფულადი შემწეობაა, რომელიც ყოველთვიურად 540 ლარს შეადგენს.

ოჯახის დიასახლისი მირანდა ნემსწვერიძე, გვიყვება, რომ ეს თანხა 5  შვილის გამოსაკვებას,  შვილიშვილის, მოხუცი მშობლების წამლებს და ოჯახის სხვა საჭიროებებზე უნდა გაანაწილოს.

"ძალიან რთულია ოჯახის დიასახლისი იყო,მაშინ როდესაც შემოსავალი არაფერი გაქვს და გასავალი იმაზე მეტია ვიდრე შემოსავალი, რა არ ვცადე რომ სამსახური დამეწყო და ორი კაპიკი ოჯახში შემომეტანა, მაგრამ მხოლოდ სახელმწიფოს მიერ დანიშნული ფულადი შემწეობის იმედად ვართ, ორი წელია ყოველდღე ერთიდაიგივე საჭმელს ვჭამთ, ბავშვი შოკოლადს, რომ მთხოვს ვერ ვყიდულობ, მაგას მირჩევნია სახლში ზეთი და სხვა პროდუქტები ვიყიდო. ტანსაცმელს გვჩუქნიან, იშვიათად ვყიდულობთ, სკოლაში აქვე დადიან, წიგნებიც სკოლამ მოგვცა'',- ამბობს მირანდა ნემწვერიძე. 

ოჯახი ფულად შემწეობას ყოველი თვის 21 რიცხვში იღებს, თუმცა ოქტომბრის თვეში განსაზღვრული ფულადი დახმარება არ ჩაერიცხათ.

ამბობს, რომ წარმოადგენა არ აქვს როგორ უნდა გაიტანოს ოჯახმა თავი.

'' ჯერ ეს თანხა რა იყო 8 სულიანი ოჯახისთვის, ესეც რომ არ დაგვერიცხა საერთოდ რა უნდა ვქნათ, მე მგონი მთავრობას არ ვაინტერესებთ, ჩვენს არსებობას მხოლოდ არჩევნების წინ გებულობენ, როცა ხმები სჭირდებათ. ახლა სააგენტომ ულუკმაპუროდ დაგვტოვა",- გვეუბნება ოჯახის დიასახლისი.

ნემსწვერიძეების ოჯახი სოციალურ საცხოვრისში ორი წლის წინ ერთ ოთახში შეასახლეს, მანამდე კი როგორც მირანდა ნემსწვერიძე გვიყვება, ნაქირავებ ბინაში ცხოვრობდნენ. თუმცა ამის გამო, რომ ოჯახს თანხის გარდა სხვა შესაძლებლობა არ ქონდა, იმ 82 შეჭირვებულ ოჯახებს შორის მოხვდა, რომლების სერთო საცხოვრისში  დააბინავეს. ნემსიწვერიძეებს იქ მხოლოდ ერთი ოთახი  ერგო. 

ამ ოჯახის მსგავსად ამ თვეში ლუკმა-პურის გარეშე დარჩნენ სოციალური საცხოვრისში კიდევ მცხოვრები 32 ოჯახი.

საცხოვრისის მობინადრეები ფულად შემწეობის პრობლემის გარდა ობიექტში არსებულ ინფრასტრუქტურულ პრობლემებზეც საუბრობენ, ამბობენ, რომ იატაკი, კედლები ნელ-ნელა იშლება.

მობინადრეების თქმით, საცხოვრისის დერეფანში ბავშვების გადაადგილება უკვე საფრთხის შემცველია. 




'' ჯერ ისედაც რა პირობებში ვცხოვრობთ, ზამთარი მოდის და ბუნებრივი აირი არ გვაქვს და იმედიც არაა რომ გაზს შემოგვიყვანენ, კიდევ სააგენტოს მიერ შეჩერებული შემწეობა გვინდოდა?!'',- ამბობს სოციალურად დაუცველი მირანდა ნემწვერიძე.

ფულადი შემწეობა საცხოვრისში მცხოვრებ 32 ოჯახს არ მიუღია, რის გამოც დღეს სოციალური მომსახურების ქუთაისის ფილილში მივიდნენ და ხელმძღვანელისგან პასუხები მოითხოვეს.

''პერიოდულად მოწმდება სოციალურად დაუცველი ოჯახები, ეს პირობა დახმარების დანიშვნისთანავე ეცნობა ოჯახს, შეღავათით ისარგებლებენ, თანხაც არ დაეკარგებათ, აგენტი გადაამოწმებს მათ საცხოვრებელ ადგილს და ისევ გაუგრძელდებათ სოციალური დახმარება'',- განმარტავს სოციალური სააგენტოს იმერეთის სამხარეოს უფროსი ნინო ჭიღლაძე. 

მიმდინარე თვეში ნიკეას N40გ-ში მცხოვრებ 32 სოციალურად დაუცველს შეწყდა დახმარების თანხა, ქუთაისის მასშტაბით კი 300-მდე ოჯახს.

მირანდა ნემსწვერიძე ნიკეას N40გ-ში ორი წელია ცხოვრობს, ფართი ყველა მცხოვრებს ერთნაირი აქვს.
ქუთაისის მერიამ 2017 წელს 80 სოციალურად დაუცველ ოჯახს ფართი 5 წლიანი ხელშეკრულებით გადასცა.




მავე თემაზე:

"რა ვაჭამო ამ თვეში შვილებს" - დაპირისპირება ქუთაისის სოციალური მომსახურების სააგენტოში (ვიდეო)
Print