ქუთაისელი მარტოხელა დედის, მზექალა აბესაძეს მოთხოვნებს ქუთაისის მერიაში პასუხობენ და ამბობენ, რომ სოციალურად დაუცველის მიერ მერიის მისამართით წაყენებული ბრალდებები უსამართლოა.
სოციალურად დაუცველი მზექალა აბესაძე, ასთმით დაავადებული მცირეწლოვანი შვილის სამკურნალოდ ლაშიჭალაში დასვენების საგზურის დაფინანსებას ადგილობრივი თვითმმართველობიდან ითხოვს. როგორც მზექალა აბესაძე ირწმუნება, მას მიმდინარე წელს ქუთაისის მერიიდან ასთმით დაავადებული შვილის სამკურნალოდ არც დახმარება და არც საკურორტო საგზური მიუღია.
ქუთაისის მერიაში კი განმარტავენ, რომ მზექალა აბესაძემ, მიმდინარე წელს, ადგილობრივი თვითმმართველობის პროგრამიდან დაბა ურეკში დასვენების საგზურით უკვე ისარგებლა.
"პროგრამა, რომლითაც ლაშიჭალაში დასვენების საგზურით ისარგებლებს სოციალურად დაუცველი მოქალაქე ადგილობრივ თვითმმართველობას არა აქვს, შესაბამისად,  ამ საგზურს ვერ მიიღებდა ვერც მზექალა აბესაძე, თუმცა მან მიმდინარე წელს ისარგებლა ურეკში დასვენების საგზურით, ასევე, ქუთაისის მერიის სარეზერვო ფონდიდან და სოციალური სამსახურიდან მოქალაქეს მიღებული აქვს სხვადასხვა დახმარებები, " - ამბობენ ქუთაისის მერიაში.
"ქუთაისიპოსტის" მიერ ინფორმაციის გადამოწმების შედეგად აღმოჩნდა, რომ მზექალა აბესაძემ მიმდინარე წელს, 25 ივლისიდან 4 აგვისტომდე, სოციალური ღონისძიებების პროგრამის ფარგლებში, დაბა ურეკში დასვენების საგზურით ისარგებლა. (საგზურის ღირებულება ორ პირზე შეადგენდა 700 ლარს)
გარდა ამისა, მედიკამეტებით უზრუნველყოფის პროგრამიდან სოციალურად დაუცველ მზექალა აბესაძეს მიმდინარე წლის 3 მარტს 100 ლარი, ხოლო სამედიცინო დახმარების პროგრამის ფარგლებში 560 ლარი აქვს მიღებული.
სოციალურად დაუცველი მზექალა აბესაძე ასევე სარგებლობს უფასო მგზავრობის ბილეთით და უფასო კვებით ქუთაისის მადლიერების სახლში.
სოციალურად დაუცველ მზექალა აბესაძეს გასულ წელს, ასევე ქუთაისის მერიის სარეზერვო ფონდიდან დახმარების სახით მიღებული აქვს 500 ლარი.
"მოქალაქემ შვილის ჯანმრთელობის დამადასტურებელი დოკუმენტაცია ვერ წარმოადგინა, თუმცა მიუხედავად ამისა მან, როგორც სოციალურად დაუცველმა ისარგებლა ყველა იმ პროგრამით, რაც რეალურად ეკუთვნოდა და მისი პრეტენზიები მერიის მისამართით აბსოლუტურად უსამართლოა,"- აცხადებენ ქუთაისის მერიაში.
როგორც მზექალა აბესაძეს მცირეწლოვანი შვილის მკურნალი მექიმი "ქუთაისიპოსტთან" საუბარში განმარტავს, ბავშვის ლაშიჭალაში გადაყვანა აუცილებლობას არ წარმოადგენს.
"მზექალა აბესაძე სარგებლობს ყველა საჭირო სამედიცინო სერვისით, მისი მცირეწლოვანი შვილი ნამდვილად არის აღრიცხვაზე, თუმცა ის რომ ბავშვს ოთხი ჯვარი აქვს ღვიძლზე არ შეესაბამება სიმართლეს. შეტევები, რომელიც ასთმის პირობებში ავადმყოფს ახასიათებს, მისი სახლის პირობებში მოხსნა შესაძლებელია, რის ფონზეც მცირეწლოვანის ჯანმრთელობას საფრთხე არ ემუქრება" - ამბობს მცირეწლოვანის მკურნალი ექიმი ნატალია ვოლკოვა.
ქუთაისში ავტომშენებლის N 7 ში მცხოვრები სოციალურად დაუცველი მზექალა აბესაძე ირწმუნება, რომ მას ქუთაისის მერიიდან მიდმინარე წელს დახმარებით არ უსარგებლია.
სოციალურად დაუცველი, მცირეწლოვანი შვილის სამკურნაოდ ლაშიჭალაში დასვენების საგზურს ითხოვს.
ანა ჯანაშია