ქუთაისის ბოტანიკურ ბაღში ესტონეთიდან, ალჟირიდან, ბელორუსიიდან, ქუვეითიდან და უკრაინიდან ჩამოსულმა ახალგაზრდებმა ადგილობრივებს თავიანთი ქვეყნის კულტურა გააცვნეს.
შეხვედრაზე მყოფმა სტუმრებმა ქართულ კერძებთან და ტრადიციულ სამოსთან ერთად, ესტონეთის, ალჟირისა და უკრაინის ტრადიციული კერძები დააგემოვნეს, ასევე სხვა ქვეყნების ტრადიციული სამოსი დაათვალიერეს.
კულტურული მრავალფეროვნების გაზიარება ღონისძიების GLOBAL VILLAGE - ის ფარგლებში,  საერთაშორისო ახაგაზრდული ორგანიზაცია AIESEC (აისეკი) - ის ორგანიზებით მოეწყო.
"მოწვეული გვყავს სტუმრები, რადგან მათ გაიცნონ ჩვენი ქვეყნის კულტურა, მეორეს მხრივ, თავადაც გაგვაცნონ თავიანთი კულტურა და ტრადიციები. ასეთ შეხვედრებს აისეკი ყოველ წელს მართავს და კარგი იქნება, თუ მომდევნო წლებში ამ ღონისძიებაში უფრო მეტი ქვეყნის სტუდენტი ჩაერთვება," - ამბობს აისეკის წარმომადგენელი ქრისტინე გერგაია.
AIESEC (აისეკი) – მსოფლიოში ყველაზე დიდი ახალგაზრდული ორგანიზაცია, ახალგაზრდებისათვის წარმოადგენს საერთაშორისო პლატფორმას, რომელიც ეხმარება მათ, აღმოაჩინონ და განავითარონ საკუთარი პოტენციალი, იქონიონ დადებითი გავლენა საზოგადოებაზე", – ასეთია ორგანიზაციის არსის ოფიციალური განმარტება, რომელიც, მეორე მსოფლიო ომის დროს, რამდენიმე სტუდენტის მიერაა შექმნილი და დღეისათვის ყველაზე მასშტაბურია.
AIESEC - ის წარმომადგენლობა საქართველოში – "აისეკ საქართველო" 2006 წლიდან არსებობს და აქტიურად მუშაობს ქართველი ახალგაზრდების არაფორმალური განათლების მიცემისა და პრაქტიკული უნარ-ჩვევების ამაღლების კუთხით.
ქუთაისიპოსტი