პარტია "თავისუფალი საქართველოს ზესტაფონის მერობის კანდიდატმა "სეს"-ის ოფისში ფაროსანები მიიყვანა. ამით მან ფაროსნების წინააღმდეგ საბრძოლველად სოფლის ,მეუნრნეობის სამინისტროს უმოქმედობა გააპროტესტა. 

"მათ აქვთ ფაროსნის გასანადგურებელი მანქანები, მაგრამ უმოქმედოდ არიან. შარშან ფაროსნების წინააღმდეგ საბრძოლველად 60 მილიონი ლარი დაიხარჯა, მაგრამ შედეგი არ ჩანს. ფაროსნების ნაცვლად ფუტკრები და ფრინველები განადგურდნენ. ფაროსანა კი თავს კარგად გრძნობს. ოფისში მოგიყვანეთ ფაროსნები და ახლა მაინც დახოცეთ",  - განაცხადა გოგი წულაიამ.

აზიური ფაროსანას საწინააღმდეგო მართვის ხელმძღვანელის, ლაშა შალამბერიძის თქმით, გოგი წულაია აღნიშნული თემის პოლიტიზირებას ცდილობს. 

,,ჯერ ერთი,  50 მილიონი იყო გამოყოფილი ფაროსნების წინააღმდეგ საბრძოლველად და არა 60 მილიონი.  30 ერთეულზე მეტი ტექნიკაა დღეს გასული იმერეთის რეგიონში, რათა უზრუნველყონ ფერომონების დამუშავება. იმერეთის მუნიციპალიტეტში სულ 13750 ფერომონია განთავსებული. ზესტაფონში 1620 ფერომონი უკვე განთავსდა. საღამოს 10-ის ნახევარზე ჩვენ ვუზრუნველვყოფთ თერმული მიწის დამუშავებას, ეს მოხდება იმის მიხედვით,  რა რაოდენობის მავნებელი გამოვა", –  განმარტა აზიურ ფაროსანას საწინაააღმდეგო ბრძოლის მართვის ხელმძღვანელმა ლაშა შალამბერიძემ.


აზიური ფაროსანა საქართველოში პირველად 2015 წელს დაფიქსირდა. მავნებელმა 2016 წელს თხილის მოსავლის მნიშვნელოვანი ზარალი გამოიწვია და გარკვეულწილად სიმინდიც დააზიანა. გარდა ამ კულტურებისა, ფაროსანა აზიანებს ხეხილოვან, კენკროვან და ბოსტნეულ კულტურებს. მავნებლის ძლიერი გავრცელების დროს მოსავლის დანაკარგებმა შესაძლოა 70%-ს მიაღწიოს.


ავტორი: ლილე ბერიძე