ქუთაისში, მერიის შენობის წინ თერჯოლის მუნიციპალიტეტის  სოფელ ჭოგნარის მოსახლეობამ აქცია  გამართა.
ისინი სოფელთან ახლოს ნაგავსაყრელის მშენებლობას აპროტესტებენ. აქციის მონაწილეთა თქმით, სულ მალე მათი სოფლის მიმდებარედ დასავლეთ საქართველოს ქალაქებიდან ჩამოტანილი ნაგვის დაყრას დაიწყებენ, რაც დააზიანებს გარემოს და ცხოვრება გაუსაძლისი გახდება.

"დაბინძურდება მიწისქვეშა წყლები, ჰაერი, აღარ გაიყიდება რძე და მაწონი, რაც ჩვენი შემოსავლის წყაროა", -  განაცხადეს აქციის მონაწილეებმა.  მოსახლეობის თქმით, თუ დაიწყება ნაგავსაყრელის მშენებლობა, ისინი პერმანენტულ აქციებს გამართავენ.

ჭოგნარის ტერიტორიაზე, 36 ჰა მიწის ფართობზე, ახალი, ევროპული სტანდარტების ნაგავსაყრელის მოწყობის სამუშაოები 2019 წლის გაზაფხულიდან უნდა დაიწყოს.

ჭოგნარის ტერიტორიაზე ახალი ნაგავსაყრელი იმერეთის, რაჭა-ლეჩხუმისა და ქვემო სვანეთის 700 000 მოქალაქეს მოემსახურება. პროექტის სრული საინვესტიციო ღირებულება 26 მლნ ევროს შეადგენს.

ნაგავსაყრელის მოწყობა მიმდინარე წელს უნდა დასრულდეს.

სამუშაოებს "მყარი ნარჩენების მართვის კომპანია" გერმანულ მხარესთან თანამშრომლობით ახორციელებს.



ამავე თემაზე:

როგორი იქნება ნაგავსაყრელი, რომელიც ჭოგნარში უნდა მოეწყოს (ვიდეო)

ნიკეას ნაგავსაყრელი ჭოგნარში რეგიონულის გახსნისთანავე დაიხურება

"არ შევეგუებით ნაგავსაყრელის აშენებას"- ჭოგნარის მცხოვრებლების აქცია ქუთაისის მერიასთან

ევროპული ნაგავსაყრელი ქართული წინააღმდეგობით (ვიდეო)