ტყიბულის შახტში დასაქმებულებსა და მაჟორიტარ დეპუტატს შორის გამართული შეხვედრა დასრულდა.

მხარეებს შორის მოლაპარაკება საათნახევარის განმავლობაში მიმდინარეობდა. ტყიბულის მაჟორიტარ დეპუტატთან შეხვედრაზე 30-მდე მეშახტე იმყოფებოდა.

"შეხვედრით არ ვართ კმაყოფილები. კონკრეტული პასუხი ვერ მივიღეთ. მხოლოდ ის გვითხრა, რომ 15 ნოემბრიდან შახტში მოპოვებითი სამუშაოები დაიწყება, თუკი დეპუტატს დავუჯერებთ. რაც შეეხება ჩვენს სოციალურ მოთხოვნებს, კონკრეტულად ვერაფერი გვითხრა. პრემიერთან შეხვედრაზე კი გვიპასუხა, რომ ახლა ჩინეთში იმყოფება და რომ ჩამოვა, ვეცდები, შეგახვედროთო", – ამბობს ერთ–ერთი მეშახტე ხვიჩა გაბუნია.

მეშახტეების მთავარი მოთხოვნა, შახტებში სამუშაოების განახლება, საშემოსავლო გადასახადის განახევრება და საპენსიო ასაკის დაწევაა.

"ნოემბრის ბოლომდე თუკი პარლამენტი მიიღებს კანონს, საშემოსავლოსა და საპენსიო ასაკის დაწევაზე, გავჩერდებით, თუ არადა გავაგრძელებთ გაფიცვებს. მარტო ხელფასების გაცემა არ ცვლის არაფერს", - ამბობს ხვიჩა გაბუნია.

მისივე თქმით,  შეთანხმება მთავრობასთან ნოემბრის თვეში ხელფასების გაცემასთან დაკავშირებით მიღწეულია და ნოემბრის თვის ხელფასს სახელმწიფო გადაიხდის.

ტყიბულში მეშახტეებმა აქცია  ორ ნოემბერს დაიწყეს. გამგეობის წინ შეკრებილები შახტებში მოპოვებითი სამუშაოების განახლებას ითხოვენ, რომელიც სამი თვეა შეჩერებულია. წინააღმდეგ შემთხვევაში მასობრივი საპროტესტო აქციებით იმუქრებიან. ისინი ამბობენ, რომ უსაფრთხოების ნორმების დაცვის კუთხით ვითარება გამოსწორდა და ნახშირის მოპოვებითი სამუშაოების დასაწყებად მზად არიან. კომპანიაში კი აცხადებენ, რომ ფინანსების არ ქონის გამო დასაქმებულებს ხელფასს ვეღარ გადაუხდიან. მეშახტეებს მერის მოადგილე შეხვდა და მთავრობასთან შუამდგომლობას დაჰპირდა.

საქართველოს მეტალურგიული და სამთო მრეწველობის მუშაკთა პროფკავშირების ხელმძღვანელი, თამაზ დოლაბერიძე ამბობს, რომ ტყიბულში მიმდინარე პროცესები მოსალონდელი იყო, რადგან მთავრობამ მათი რეკომენდაცია არ მიიღო, რომელიც შახტში მუშაობის უსაფრთხოდ განახლებას ითვალისწინებდა.

ტყიბულის შახტში მოპოვებითი სამუშაობები მიმდინარე წლის ხუთ აპრილს, ექვსი მეშახტის დაღუპვის შემდეგ შეჩერდა. უბედური შემთხვევის შემდეგ, კომპანია "საქნახშირი", რომელიც ტყიბულის შახტებში ოპერირებს, ბაზრიდან შესაძლო გასვლაზეც ალაპარაკდა. კომპანიას უბედური შემთხვევის შემდეგ ნახშირის მოპოვებითი სამუშაოები აღარ უწარმოებია.