"დატოვე პარლამენტი ქუთაისში"- ამ საკითხით გაიხსნა ქუთაისის მერთან არსებული სამოქალაქო საბჭოს რიგით მეექვსე სხდომა.

საბჭოს წევრებმა ქუთაისში პარლამენტის არსებობის მნიშვნელობაზე ისაუბრეს და ადგილობრივ ხელისუფლებას მოუწოდეს დააფიქსირონ თავიანთი პოზიცია პარლამენტის გადატანასთან დაკავშირებით.

საბჭოს წევრები სხდომაზე  "დატოვე პარლამენტი ქუთაისში" –ამ წარწერებიანი მაისურებით გამოცხადდნენ. 

"ქუთაისის მერობა ნიშნავს ქალაქის და მოსახლეობის ინტერესების დაცვას, ამიტომ მიმაჩნია, რომ მერმა ადგილობრივი ხელისუფლების წარმომადგენლებთან ერთად უნდა დააფიქსირონ მკვეთრი პოზიცია პარლამენტის გადატანასთან დაკავშირებით.

ბევრს საუბრობენ იმაზე, რა მოუტანა პარლამენტმა ქუთაისს. 2012 წელს, როცა პარლამენტმა მუშაობა დაიწყო, უკვე ბევრ მსხვილ ინვესტორთან იყო შეთანხმება მიღწეული, რომ ინვესტიციები განეხორციელებინათ ქუთაისში, მაგრამ პირველივე სხდომაზე, პარლამენტის მაშინდელმა თავმჯდომარემ დავით უსუფაშვილმა განაცხადა, რომ პარლამენტი თბილისში დაბრუნდებოდა. ამის შემდეგ ყველა ეს შეთანხმება გაუქმდა. შესაბამისად, იმის თქმა, რა მოუტანა პარლამენტმა ქუთაისს, არასწორია "-განაცხადა საბჭოს წევრმა, ქეთი ბერძენიშვილმა.

შეხვედრაზე აჩვენეს სამოქალაქო ინიციატივის ფარგლებში მომზადებული ვიდეორგოლი, სადაც ჟურნალისტები, მწერლები და საზოგადოებისთვის ცნობილი სახეები არგუმენტირებულად ხსნიან, თუ რატომ სჭირდება პარლამენტი ქუთაისს.

სხდომას არ ესწრებოდა ქუთაისის მერი გიორგი ჭიღვარია, თუმცა, საბჭოს წევრები შეთანხმდნენ, რომ პარლამენტის გადატანასთან დაკავშირებით,  პოზიციის დაფიქსირების შესახებ  რეკომენდაციას,  ქალაქის მერს ოფიციალურად გაუგზავნიან.